मुर्तिजापूर (महेश सावळे)- महाराष्ट्रामधील शेतकऱ्यांच्या संकटामध्ये दिवसेंदिवस भर पडत आहे. बँकेकडून नाकारल्या जाणारा कर्ज पुरवठा, नकली सोयाबीन बियाणामुळे करावी लागलेली दुबार पेरणी, युरिया खताचा तुटवडा व काळा बाजार, अनेक ठिकाणी अतिवृष्टीमुळे पिकाचे झालेले नुकसान अशा विविध संकटामध्ये शासनाकडून शेतकऱ्यांना कोणताही दिलासा प्राप्त झाला नाही. या संकटाच्या माळेमध्ये दुधाचे भाव कमी झाल्याने दुध उत्पादक शेतकऱ्यांची अवस्था दयनीय झाली आहे.
महाराष्ट्रामध्ये १ कोटी ४० लाख लिटर गायीचे दुध उत्पादित होते. त्यापैकी ३५ लाख लिटर सहकारी संघाकडून खरेदी केल्या जाते. ९० लाख लिटर दुध खाजगीसंस्था व डेअरीच्या माध्यमातून विकत घेतल्या जाते. १५ लाख लिटर दुध शेतकरी स्वत: हॉटेल्स, ग्राहक यांना पुरवितो. शासकीय योजनेद्वारे फक्त १ लाख लिटर दुध खरेदी केले जाते. या कोरोनाच्या लॉकडाऊनच्या काळात दुधाचा विक्रीमध्ये ३० टक्केपर्यंत घट झाली. शहरातील हॉटेल्स, चहाची दुकाने बंद असल्यामुळे दुधाची मागणी घटली. आजच्या घडीला खाजगी संस्था व सहकारी दुध संघाकडून दुध १५ ते १६ रु. दराने खरेदी केल्या जात आहे. त्यामुळे दुधाचा उत्पादन खर्च सुद्धा निघू शकत नाही. शासनाने १० लाख लिटर दुध २५ रु. प्रती लिटर या भावाने खरेदी करण्याची घोषणा केली होती. परंतु प्रत्यक्षात ७ लाख लिटर दुध खरेदी केल्या जात आहे. मंत्र्याचे लागेबांधे असलेल्या दुध संघाकडून शासन दुध विकत घेत आहे. इतर शेतकऱ्यांना व दुध उत्पादकांना शासनाने वाऱ्यावर सोडले आहे. गायीच्या दुधाला प्रती लिटर १० रु. अनुदान, दुध भुकटी करिता प्रती किलो ५० रु अनुदान, शासनाकडून ३० रु. प्रती लिटरने दुधाची खरेदी या न्याय्य मागण्याकरिता ना. संजय धोत्रे (केंद्रीय राज्यमंत्री भारत सरकार), .आ. रणधीर सावरकर (भाजपा जिल्हाध्यक्ष अकोला), यांच्या मार्गदर्शनाखाली .आ.हरिष मारोतीआप्पा पिंपळे यांच्या नेतृत्वाखाली आज मूर्तिजापूर येथे महाएल्गार आंदोलन करण्यात आले. मूर्तिजापूर येथील शासकीय दूध संकलन व शितकरण केंद्र मूर्तिजापूर तसेच छत्रपती शिवाजी चौक मूर्तिजापूर, यात्रा चौक सिरसो, लाखपूरी, धोत्रा शिंदे, बिडगाव, माना, कुरुम, बपोरी, येथे आंदोलन करण्यात आले. यावेळी तालुकाध्यक्ष भूषण कोकाटे, शहराध्यक्ष रीतेश सबाजकर, मोनालीताई गावंडे (नगराध्यक्षा न.प. मूर्तिजापूर), सचिन देशमुख (भाजयुमो जिल्हाध्यक्ष अकोला), सौ.मानके ताई तालुकाध्यक्ष महिला मोर्चा,पप्पू पाटील मुळे (भाजयुमो तालुकाध्यक्ष मूर्तिजापूर), हर्षल साबळे (भाजयुमो शहराध्यक्ष मूर्तिजापूर), अनिल ठोकळ (शेतकरी आघाडी), प्रशांत हजारी( शेतकरी आघाडी )तसेच हजारो कार्यकर्ते यांची उपस्थिती होती.