अकोला (प्रतिनिधी) : संभाजी ब्रिगेडचे विभागीय अध्यक्ष पंकज जगतराव जायले यांना सनातनच्या साधकाकडून जीवे मारण्याची धमकी मिळाली असल्याने सिटी कोतवाली पोलिस स्टेशनमध्ये गुन्हा दाखल करण्यात आला आहे. याप्रकरणी संभाजी ब्रिगेडचे कार्यकर्ते आक्रमक झाले असून याप्रकरणी जिल्हाधिका-यांना निवेदन देवून संरक्षण करण्याची मागणी करण्यात येणार आहे.
संभाजी ब्रिगेडचे विभागीय अध्यक्ष पंकज जगतराव जायले वय ४० गोरक्षण रोड अकोला यांना सनातनचा साधक असलेला सिध्देश पाटील रा. खोपोली जि. रायगड याने त्यांच्या ७०६६६२४३४१ या क्रमांकावरून शिवीगाळ करून जिवे मारण्याची धमकी दिली आहे. मी सनातनचा साधक असून माझे कोणीच काही बिगडू शकत नाही. तुला तीन दिवसात जीवाने मारले नाही तर सनातनचा साधक नाही, असे उजागरपणे सांगत आहे. तसेच महामानवांच्या विरूध्द अश्लिलभाषा वापरून जातीय तेढ निर्माण करत असल्याने पंकज जायले यांनी सिटी कोतवाली पोलिस स्टेशनशी संपर्क साधला आहे. यावरून त्यांनी जबानी रिपोर्ट दिला असून त्यावरून तक्रार दाखल करण्यात आली आहे. त्यानुसार पोलिसांनी कलम ५०४, ५०६, ५०७ नुसार गुन्हा दाखल केला आहे. याप्रकरणामुळे संभाजी ब्रिगेडचे कार्यकर्ते आक्रमक झाले असून जिल्हाधिका-यांना १० सप्टेंबरला निवेदन सादर करणार आहे. त्यांच्या जीवाला धोका निर्माण झाला असून त्यांना संरक्षण पुरविण्यात यावे अशी मागणी करण्यात येणार आहे.
