सांगली :
गुजरातमधील बोताड व कच्छ जिल्ह्यांमध्ये क्रिमीन कांगो हेमोरेजिक फिवर या रोगाचा प्रादुर्भाव पशुधनामध्ये आढळून आला आहे. हा रोग झनोटिक म्हणजे ‘जनावरांपासून माणसांना होणारा रोग’ या स्वरूपाचा आहे. त्याचा प्रादुर्भाव गुजरातमधून महाराष्ट्रात होण्याची शक्यता आहे. त्यामुळे जिल्ह्यातील सर्व पशुपालकांनी विशेष खबरदारी घ्यावी, असे आवाहन जिल्हा पशुसंवर्धन उपआयुक्त डॉ. एस. एस. बेडक्याळे यांनी केले आहे.
बेडक्याळे म्हणाले, क्रिमीन कांगो हेमोरेजिक फिवर हा रोग नैरो या विषाणूमुळे होत आहे. हे विषाणू मुख्यत्वे गोचिडाव्दारे एका जनावरापासून दुसर्या जनावराला व बाधित जनावरापासून मानवांमध्ये संक्रमित होतात.
लक्षणे आढळत नाहीत, पण..!
डॉ. बेडक्याळे म्हणाले, गाय, म्हैस, शेळी, मेंढी अशा पाळीव प्राण्यांमध्ये तसेच शहामृग इत्यादी पक्ष्यांमध्ये सहसा या रोगाची कोणतीही लक्षणे आढळून येत नाहीत. पण अशी बाधित जनावरे या विषाणूंचे वाहक असतात. त्यांच्या संपर्कामध्ये आलेल्या मानवांना या रोगाचा प्रादुर्भाव होण्याची दाट शक्यता आहे.
मानवांना प्रादुर्भाव; मृत्यूचीही शक्यता
डॉ. बेडक्याळे म्हणाले, बाधित जनावरांचे मांस खाल्याने तसेच बाधित जनावरांच्या रक्ताच्या संपर्कात आल्याने मानवांना प्रादुर्भाव होण्याची शक्यता आहे. या रोगाच्या प्रादुर्भावामुळे बाधित व्यक्तींपैकी 30 टक्क्यांपर्यंत व्यक्ती त्वरित निदान व उपचार न झाल्यास मृत्यू पावण्याची शक्यता असते.
खबरदारी काय घ्यावी
पशुपालकांनी जनावरांवरील व गोठ्यामधील गोचिड व कीटकांचे उच्चाटन करणे आवश्यक आहे.त्यासाठी स्थानिक पशुवैद्यकांच्या सल्ल्याने औषधांची फवारणी जनावरांवर व गोठ्यामध्ये करणे अत्यावश्यक आहे. रोगग्रस्त पशूंचे कच्चे मांस खाल्याने प्रादुर्भाव होऊ शकतो. मांस चांगल्या प्रकारे शिजवूनच खावे. कत्तलखान्यात काम करणार्या व्यक्तींनी प्राण्यांच्या रक्त, मांस अथवा इतर द्रावाशी थेट संपर्क येणार नाही, याची काळजी घ्यावी. गमबूट , ग्लोव्हज वापरणे आणि चेहर्यावर मास्क बांधणे किंवा पूर्ण शरीरभर संरक्षक कपड्यांचा वापर करणे अत्यावश्यक आहे. शेतकरी, पशुपालक यांनीही काळजी घेणे आवश्यक आहे. लक्षणे दिसून आल्यास तत्काळ नजिकच्या आरोग्य विभागाशी संपर्क साधावा, असे आवाहनही डॉ. बेडक्याळे यांनी केले आहे.
व्यक्तींमध्ये ही लक्षणे दिसून येतात ..!
डॉ. एस. एस. बेडक्याळे म्हणाले, क्रिमीन कांगो हेमोरेजिक फिवर या रोगाविरुध्द प्रभावी व हमखास उपयुक्त उपचार सध्या उपलब्ध नाहीत. बाधित व्यक्तींमध्ये सुरुवातीला डोकेदुखी, ताप येणे, सांधेदुखी, पोटदुखी, उलटी होणे ही लक्षणे दिसून येतात. आजारी व्यक्तीचे डोळे लाल दिसतात. घशात तसेच तोंडातील वरच्या भागात लाल ठिपके दिसू लागतात. आजार बळावल्यास त्वचेखालील रक्तस्त्राव, नाकातून रक्तस्त्राव अशी विचित्र लक्षणे दिसून येतात. या रोगाची लागण ज्या व्यक्तीचा व्यावसायिक कारणामुळे संक्रमित पशुशी संपर्क येतो अशा कत्तलखान्यात काम करणार्या व्यक्ती अथवा पशुपालकांना होण्याची शक्यता आहे.