नांदेड : काँग्रेस नेते राहुल गांधी यांची ‘भारत जोडो यात्रा’ मंगळवारी महाराष्ट्रात प्रवेश करत आहे. नांदेड जिल्ह्यातील देगलूर तालुक्यामध्ये ही यात्रा दाखल होणार असून, पुढील चार दिवस या यात्रेचा प्रवास नांदेड जिल्ह्यातून होणार आहे. या यात्रेसाठी काँग्रेसकडून जय्यत तयारी करण्यात आली आहे. तर, नांदेड पोलिस दलातील वरिष्ठ अधिकारी देगलूरमध्ये तळ ठोकून आहेत.
राहुल गांधी यांची ही यात्रा तेलंगणमधून देगलूरमध्ये प्रवेश करणार आहे. या यात्रेसाठी प्रदेश पातळीवरील अनेक दिग्गज नेते नांदेडमध्ये दाखल झाले आहेत. या यात्रेत काँग्रेसबरोबरच महाविकास आघाडीतील अन्य घटक पक्षाचे नेतेही सहभागी होणार आहेत. तसेच, काही सामाजिक संघटनांचाही या यात्रेत सहभाग असेल. नांदेडच्या नवा मोंढा मैदानावर १० नोव्हेंबर रोजी या यात्रेतील राज्यातील पहिली सभा होईल. या सभेला काँग्रेस नेत्यांसह राष्ट्रवादी काँग्रेसचे अध्यक्ष शरद पवार, सामाजिक कार्यकर्त्या मेधा पाटकर, पीपल्स रिपब्लिकन पक्षाचे जोगेंद्र कवाडे यांच्यासह शिवसेनेचे ज्येष्ठ नेते उपस्थित राहण्याची शक्यता आहे.