पूजा चव्हाण मृत्यू प्रकरणी वनमंत्री संजय राठोड यांच्याविरोधात आक्रमक भूमिका घेतलेल्या भाजप नेत्या चित्रा वाघ आता एका प्रकरणामुळे अडचणीत आल्या आहेत. बेहिशेबी मालमत्ता प्रकरणात चित्रा वाघ यांचे पती किशोर वाघ यांच्याविरोधात लाचलुचपत प्रतिबंधक विभागाने गुन्हा दाखल केला आहे.
बेहिशेबी मालमत्ता प्रकरणी किशोर वाघ यांना २०१६ मध्ये अटक देखील झाली होती. या प्रकरणाचा तपास सुरु असून यादरम्यान आता त्यांच्याविरोधात लाललुचपत प्रतिबंधक विभागाने गुन्हा दाखल केला आहे. हा गुन्हा १२ फेब्रुवारी रोजी नोंद करण्यात आला आहे.
राष्ट्रीय ग्राहक तक्रार निवारण कक्षाने दिलेल्या आदेशानुसार १५ लाखांची नुकसान भरपाई देण्यासाठी परळच्या महात्मा गांधी रुग्णालयाचे वैद्यकीय अधीक्षक डॉ. गजानन भगत यांनी चार लाखांची लाच मागितल्याचे उघडकीस आले होते. या प्रकरणी पोलिसांनी सापळा रचून डॉ. भगत यांच्यासह मेडिकल रेकॉर्डच्या नोंदी ठेवणारे किशोर वाघ आणि संदेश कांबळे यांना रंगेहाथ पकडले होते.
किशोर वाघ यांच्या विरोधात ५ जुलै २०१६ रोजी लाचलुचपत प्रतिबंधक विभागाने गुन्हा नोंद केला होता. त्यांना त्यावेळी सेवेतून निलंबित करण्यात आले होते. अद्याप ते सेवेतून निलंबित आहेत. त्यावेळी त्यांच्या परेल येथील निवासस्थानाची झडती घेण्यात आली होती. किशोर वाघ यांनी त्यांचे मालमत्तेसंदर्भात ६ फॉर्मस लाचलुचपत प्रतिबंधक विभागास सादर केले होते.
यातून किशोर वाघ यांचे स्वतःचे व कुटुंबियांचे नावे असलेल्या मालमत्तांची तसेच त्यांनी केलेल्या खर्चाची व त्यांना विविध कायदेशीर सेवाकालावधीतील परीक्षण कालावधी दि. १ डिसेंबर २००६ ते दि. ५ जुलै २०१६ दरम्यान त्यांना कायदेशीर मार्गाने प्राप्त होणारे उत्पन्न त्यांच्या ज्ञात उत्पन्नापेक्षा अधिक असल्याचे आढळून आल्याचे एफआयआरमध्ये नमूद करण्यात आले आहे.
या प्रकरणाचा तपास सुरु असून यादरम्यान आता त्यांच्याविरोधात लाललुचपत प्रतिबंधक विभागाने गुन्हा दाखल केला आहे.
दरम्यान, या कारवाईवरुन चित्रा वाघ यांनी आपल्याला काहीच माहित नसल्याचे म्हटले आहे. पतीविरोधात एफआयआर दाखल झाल्याचे आपल्याला कळवलं नाही. लाच घेताना तिथे माझा पती तिथे नव्हता. तरीही त्याच्याविरोधात केस दाखल केली, असा आरोप त्यांनी केला आहे.
माझ्या नवऱ्याला व्हॉट्स ॲपवरुन नोटीस पाठवली. नोटीस पाठवायला माणसं नव्हती काय? असा सवाल चित्रा वाघ यांनी उपस्थित केला आहे.