नवी दिल्ली : सर्वसामान्यपणे कुटुंबात एखादी गर्भवती असेल तर तिच्या आरोग्याची विशेष काळजी घेतली जाते. डॉक्टरही असाच सल्ला देतात. तसेच गर्भवतीही बसताना अथवा उठताना स्वताची काळजी घेत असते. मात्र, एका नऊ महिन्यांच्या गर्भवतीने अवघ्या पाच मिनिटांत 1.6 किलोमीटरचे अंतर धावत पूर्ण करत सर्वांनांच आश्चर्यचकीत केले. या गर्भवतीचा व्हिडीओ सोशल मीडियावर सध्या वेगाने व्हायरल होता आहे. तसेच पाहणारे लोक तिचे कौतुकही करत आहेत.
सोशल मीडियावर व्हायरल होत असलेला हा व्हिडीओ तिच्या पतीने म्हणजे मायकल मायलरने शेअर केला आहे. त्याने आपल्या 9 महिन्यांच्या पत्नीशी धावण्याची शर्यत लावली. तसेच जिंकल्यास 100 डॉलर्स बक्षिसादाखल देण्याचे मान्य केले.
मायलरने दिलेल्या माहितीनुसार खरे तर त्याच्या पत्नीला आठ मिनिटांत एक मैल अंतर धावून पूर्ण करावयाचे होते. मात्र, तिने त्यापेक्षा कमी वेळ घेत म्हणजे हे अंतर अवघ्या 5.25 सेकंदात पूर्ण केले. दरम्यान, मायकल मायलर जरी आपल्या पत्नीकडून हरला असला तरी तिला तिचा अभिमान वाटतो. कारण गर्भवती असतानाही ती एखाद्या खेळाडूसारखी धावत होती.धावण्याच्या याच प्रसंगाचा व्हिडीओ मायलरने सोशल मीडियावर शेअर केला असून त्यावर प्रतिक्रियांचा पाऊस पडत आहे. काही लोक तिला आयर्न लेडी असल्याचे म्हणत आहेत.