अकोला- कान्हेरी गावाजवळ ग्राम पंचायतीने शहराला पाणी पुरवठा करणाऱ्या मुख्य जलवाहिनीवरच बोअर खोदण्याचे काम सुरु केले. या प्रकारामुळे मुख्य जलवाहिनी फुटली. परिणामी लाखो लिटर पाण्याचा अपव्यय झाला तर दुसरीकडे शहराचा पाणी पुरवठा विस्कळीत झाला.
शहराला महान येथील जलशुद्धीकरण केंद्रातून पाणी पुरवठा केला जातो. रस्त्याच्या एका बाजूने ६०० मिलिमीटर व्यासाची तर दुसऱ्या बाजूने ९०० मिलिमीटर व्यासाच्या जलवाहिनीतून शहरातील जलकुंभांमध्ये पाणी पोहोचवले जाते. दोन दिवसापूर्वी अशोक वाटिका चौकात मुख्य जलवाहिनीवरील व्हॉल्व्ह नादुरुस्त झाल्याने शहराचा पाणी पुरवठा विस्कळीत झाला. आता मुख्य जलवाहिनी फुटल्याने शहराचा पाणी पुरवठा विस्कळीत झाला आहे. कान्हेरी ग्राम पंचायतीच्या वतीने रस्त्यालगत सार्वजनिक बोअर खोदण्याचे काम ११ डिसेंबरला सकाळी आठ वाजता सुरु करण्यात आले. बोअर घेताना रस्त्यालगत टाकलेल्या मुख्य जलवाहिनीकडे दुर्लक्ष केल्याने ज्या ठिकाणी ६०० मिलिमीटर व्यासाची मुख्य जलवाहिनी आहे,नेमके त्याच ठिकाणी बोअर खोदण्याचे काम सुरु केले. मात्र हे बोअर थेट जलवाहिनीवरच घेतल्याने २० ते २५ फुटा पर्यंत पाण्याचे कारंजे उडू लागले. हे जमिनीतील पाणी नसून जलवाहिनीतील पाणी आहे, ही बाब लक्षात आल्या नंतर जलशुद्धीकरण केंद्रातून ६०० मिलिमीटर व्यासाच्या जलवाहिनीला होणारा पाणी पुरवठा बंद करण्यात आला. परंतु तो पर्यंत लाखो लिटर पाणी वाहून गेले. जलवाहिनी फुटल्याची बाब पाणी पुरवठा विभागाला समजल्या नंतर त्वरित दुरुस्तीचे काम सुरु केले. जलवाहिनी दुरुस्तीचे काम पूर्ण झाल्या नंतर या वाहिनीवरील पाणी पुरवठा सुरळीत होईल.
मुख्य जलवाहिनी दुरुस्तीचे काम करणाऱ्या कंत्राटदाराचे यापूर्वीचे महान जलशुद्धीकरण केंद्रातील दुरुस्तीचे १० लाखाचे देयक थकीत आहे. हे देयक देण्यास मनपाकडून टाळाटाळ केली जात आहे. मात्र आता पुन्हा त्याच कंत्राटदाराला मुख्य जलवाहिनी दुरुस्तीच्या कामासाठी महापालिकेला पाचारण करावे लागले. दोन दिवसापूर्वी अशोक वाटिका चौकातील व्हॉल्व्ह नादुरुस्त झाल्याने जुने शहरासह काही भागांचा पाणी पुरवठा दोन दिवसाने पुढे ढकलला होता. आता ६०० मिलिमीटर व्यासाची जलवाहिनी फुटल्याने जुने शहरासह बस स्थानक जलकुंभावरून ज्या भागाला पाणी पुरवठा होतो, त्या भागाचा पाणी पुरवठा एक दिवसाने पुन्हा पुढे ढकलण्यात आला आहे. त्यामुळे नागरिकांना त्रास सहन करावा लागत आहे.
बोअर घेताना ती मुख्य जल वाहिनीवर येवू नये, याची काळजी ग्रा. पं.ने घेणे गरजेचे होते. मात्र ही काळजी ग्रा. पं.ने घेतली नाही. त्यामुळे मनपाला जलवाहिनी दुरुस्तीचा फटका बसला. हे लक्षात घेवून मनपाने जलवाहिनी दुरुस्तीचा खर्च ग्रा, पं.कडे मागितला. तो न दिल्यास ग्रा.पं. विरुद्ध एफआयआर नोंदवण्याचा निर्णय मनपाने घेतला.
अधिक वाचा : जनसामान्यांच्या आरोग्यासाठी अकोल्यात 30 व 31 डिसेंबरला महाआरोग्य अभियान
अकोला शी संबंधित सर्व बातम्यांसाठी आम्हाला फेसबुक, ट्विटर, यूट्यूब वर फॉलो करा.
अवर अकोला ला फेसबुक वर लाईक करा – www.facebook.com/OurAkolaMedia
अवर अकोला’च्या यूट्यूब चॅनेलला सबस्क्राईब करा – www.youtube.com/OurMediaNetworks
अवर अकोला ला ट्विटरवर फॉलो करा – https://twitter.com/ourakola
अवर अकोला ला इन्स्टाग्रामवर फॉलो करा – www.instagram.com/OurAkola