रिधोरा (पंकज इंगळे)- देशरक्षणार्थ विविध ठिकाणी कर्तव्य बजावल्यानंतर सैन्य दलातील सेवानिवृत्त झालेल्या रिधोरा येथील सैनिकाचे गावकऱ्यांनी अनोख्या पद्धतीने जल्लोषात स्वागत केले. 1मार्च रोजी हा स्वागत समारोह झाला असून ढोल ताशे व बॅन्ड पथकाच्या गजरात गावातून भव्य मिरवणूक काढण्यात आली.रिधोरा येथील सुभेदार आनंद उत्तमराव दंदी हे भारतीय सैन्य दलात कार्यरत होते. 28 फेब्रुवारी 2023 रोजी ते महार रेजीमेंट सागर येथे सेवानिवृत्त झाले. 1 मार्च रोजी ते आपल्या मूळ गावी रिधोरा येथे येणार असल्याने गावकऱ्यांनी त्यांच्या स्वागताची जय्यत तयारी केली होती. रिधोरा येथील बसस्थानकावर आगमन होताच पंचशील क्रीडा मंडळ रिधोरा ,गावातील नागरीक, व्यावसायीक, शाळा ,महाविद्यालय ग्रा.पं.कार्यालय, विविध संघटना,अधिकारी पदाधिकारी यांनी त्यांचे शाल, श्रीफळ व पुष्पहाराने स्वागत केले. तेथुन ढोल, ताशे व बँड पथकाच्या गजरात राष्ट्रभक्तीपर गीतांच्या निनादात त्यांच्या राहत्या घरापर्यंत वाजत, गाजत मिरवणुक काढण्यात आली. गल्लोगल्ली गावातील महिलांनी रांगोळी काढुन औक्षण करीत स्वागत केले.
याच कार्यक्रमादरम्यान दंदी परिवार रिधोरा गावाच्या वतीने व परिसरातील आजी माजी सैनिकांचा शाल,श्रीफळ व पुष्पहार देवुन सत्कार करण्यात आला. यामध्ये माजी सैनिक उपस्थित होते. गावकऱ्याच्यावतीने झालेला अनोखा सत्कार पाहून सुभेदार आनंद दंदी भारावून गेले. यावेळी सत्काराला उत्तर देतांना ते म्हणाले की, सेवानिवृत्ती नंतरचे माझे जीवन गावातील तरुणांना देशसेवा, राष्ट्रभक्ती, सामाजिक बांधिलकी व एकोपा निर्माण करण्यासाठी कार्य करीन, असे सांगितले. कार्यक्रमाला गाव व परिसरातील बहूसंख्य नागरीक, महिला, विद्यार्थी, माजी सैनिक, अधिकारी, पदाधिकारी, आजी सैनिक असा प्रचंड जनसमुदाय उपस्थित होते. राष्ट्रगिताने कार्यक्रमाची सांगता झाली.
ठळक मुद्दे
* रिधोरा येथील सुभेदार आनंद उत्तमराव दंदी हे भारतीय सैन्य दलात यांनी 27 वर्ष आपले संपूर्ण कर्तव्य बजावून दिनांक 1 मार्च 2023 सेवा निवृत्त करून आले .
* राष्ट्रभक्तीपर गीतांच्या निनादात त्यांच्या राहत्या घरापर्यंत वाजत, गाजत मिरवणुक काढण्यात आली.
गावकऱ्याच्यावतीने झालेला अनोखा सत्कार पाहून सुभेदार आनंद दंदी भारावून गेले.
