अकोला (संजय कमल अशोक)- महाराष्ट्र राज्य लॉटरीच्या दसरा बंपर आॅफरच्या कोट्यावधी तिकिटांवर चक्क विड्याच्या कलकत्ता बांगला पट्टी पानाचे छायाचित्र छापल्याने ग्राहक संभ्रमात पडले असुन विक्रेत्यांना नानाविध प्रश्न विचारत आहेत. या घोड चुकिमुळे महाराष्ट्र राज्य लाॅटरीच्या कारभारावर संशय व्यक्त केला जात असुन तिकिट विक्रीवर या वाईट परिणाम होणार असल्याचे दिसुन येत आहे.
याबाबत सविस्तर वृत्त असे की, महाराष्ट्र राज्य लॉटरी विविध सणांना विषेश भव्यतम सोडत तिकिटे काढत असते. त्या त्या सणाशी संबंधित चित्र तिकिटांवर प्रकाशित करून राज्यभर तिकीट विक्री करीत असते. जसे की गुढीपाडव्याला गुढीचे छायाचित्र गणपतीमध्ये गणेशाची छायाचित्र प्रकाशित करून ग्राहकांना आपल्याकडे खेचण्याचा प्रयत्न करीत असते. या आकर्षक चित्रांमुळे लॉटरी तिकीट विक्रीमध्ये वृद्धी होऊन राज्य शासनाला तेवढा अधिक महसूल मिळतो.
यंदाच्या दसऱ्याच्या निमित्ताने प्रकाशित केलेल्या दसरा भव्यतम सोडत अर्थात दसरा बंपर ऑफर या सोडत क्रमांक दोनच्या लॉटरीच्या सर्व तिकीटांवर चक्क खायच्या विड्याच्या पानाकरिता वापरण्यात येणाऱ्या कलकत्ता बांगला पट्टी पानाचे छायाचित्र प्रकाशित करण्यात आले. विशेष म्हणजे कोट्यावधी तिकिटांवर तसेच या तिकिटांच्या विक्रीकरिता होत असलेल्या जाहिरात फलकांवर सुद्धा ह्याच पट्टी पानाचे छायाचित्र प्रकाशित करून राज्यभर प्रसारित करण्यात आले आहे.
दसऱ्याला एकमेकांना शुभेच्छा देण्यासाठी आणि पूजेसाठी सोने म्हणून शमी पानांचा वापर करण्यात येतो तर चांदी म्हणून आपट्याच्या पानांचा वापर करण्यात येतो. या दोन्ही पानांचा वापर सर्वत्र प्रसार माध्यमे करीत असतात पण महाराष्ट्राच्या राजकोषामध्ये आपल्या विक्रीतून भर टाकणार्या दसरा बंपर ऑफर चे तिकीट हे बंफर पिऊन तर बनविले नाही ना? असा सवाल जागृक ग्राहक लाॅटरी विक्रेत्यांना करित आहेत.
तब्बल ५१ लाख रुपयांचे प्रथम सामायिक बक्षीस असताना आणि दहा हजाराची १०० बक्षीसं असुन प्रति तिकिट दर तब्बल २०० रुपये असताना एवढ्या मोठ्या विशेष सोडतीच्या तिकीट निर्मितीत जर ऐवढी ठळक चूक होत असेल तर येणारा लॉटरी निकाल हा अचूक कशावरून असणार असा संशय जागरूक ग्राहक घेत आहेत. येत्या ४ ऑक्टोबर रोजी होणाऱ्या या तिकिटाच्या सोडतीच्या निकालापूर्वी राज्य शासनाने तिकिटावर प्रकाशित या पानाचा खुलासा करावा आणि ग्राहकांमधील संभ्रम दुर करावा, अशी मागणी चोखंदळ ग्राहकांनी केली आहे.
ग्राहकांच्या प्रश्नाने परेशान होत आहोत!
दसरा बंपर ऑफर तिकिटावर पानाचे छायाचित्र छापले आहे हे छायाचित्र दसऱ्यासाठी वापरण्यात येणाऱ्या पानांचे आहे की कशाचे आहे? याबाबत ग्राहक सतत प्रश्न विचारतात आणि तिकीट घेणे नाकारतात त्यामुळे आम्ही विक्रेते परेशान झालो आहोत.
महेंद्र गाडवे, लाॅटरी विक्रेता
आनंद लाॅटरी सेंटर, अकोला.
