पोलीस उपनिरीक्षक (पीएसआय) पदाचे लक्ष्य डोळ्यासमोर असलेल्या उमेदवारांना आता शारीरिक चाचणीचा सरावसुद्धा योग्यरित्या सुरू ठेवावा लागणार आहे. पदाची मुलाखत देण्यासाठी शारीरिक चाचणीत 60 गुण मिळवणे आवश्यक असणार आहे. एमपीएससी (महाराष्ट्र लोकसेवा आयोग) यासंदर्भात मंगळवारी नव्या निर्णयाची अधिसूचना जारी केली आहे.
शारिरिक चाचणीच्या निकालाच्या आधारे मुलाखतीसाठी पात्र ठरलेल्या उमेदवारांनाच पोलीस उपनिरीक्षक पदाच्या मुलाखतीसाठी बोलवण्यात येते. मुख्य परीक्षेत यशस्वी झालेल्या उमेदवारांना आता शारीरिक चाचणी व मुलाखत या टप्प्यांसाठी मोठी तयारी करावी लागणार आहे. नव्या निर्णयानुसार पीएसआय पदाची मुलाखत देण्यासाठी शारीरिक चाचणीत 60 गुण मिळवणे आवश्यक असणार आहे. शारीरिक चाचणीत 60 गुण असतील तरच आता विद्यार्थ्यांना मुलाखत देता येणार आहे.
एपीएससीच्या 2020 मध्ये निघालेल्या जाहिरातीसाठी हा नियम लागू असणार आहे. तशी माहिती एमपीएससीकडून देण्यात आली आहे. यापूर्वी शारीरिक चाचणीचे गुण निकालासाठी एकत्रित केले जात होते. मात्र आता अंतिम गुणवत्ता यादीतून शारीरिक चाचणीचे गुण वगळण्यात आले आहेत. हे गुण आता फक्त पात्रतेसाठी ग्राह्य धरले जाणार आहेत. यापूर्वी मुलाखतीस पात्र होण्यासाठी शारीरिक चाचणीमध्ये किमान 50 गुण मिळविणे आवश्यक होते आता दहा गुणांची वाढ होत 60 गुणांची अट झाली आहे.
