मुंबई : महाराष्ट्र घरेलू कामगार कल्याण मंडळाकडे नोंदणी व नूतनीकरण झालेल्या घरेलू कामगारांसाठी पहिल्या टप्प्यात सक्रिय व नोंदणी असलेल्या एकूण 1 लाख 5 हजार 500 घरेलू कामगारांना प्रत्येकी दीड हजार रुपयांप्रमाणे एकूण 15 कोटी 82 लाख 50 हजार रुपये इतका निधी वितरीत करण्यात येणार असल्याची माहिती कामगारमंत्री हसन मुश्रीफ यांनी दिली.
राज्यात कडक निर्बंध लावलेल्या काळात घरेलू कामगारांना आर्थिक सहाय्य देण्याचा निर्णय मुख्यमंत्री उद्धव ठाकरे यांनी घेतला आहे. या नुसार महाराष्ट्र घरेलू कामगार कल्याण मंडळाकडे नोंदणी व नूतनीकरण झालेल्या घरेलू कामगारांच्या बँक खात्यामध्ये थेट हस्तांतरण (डीबीटी) द्वारे प्रत्येकी दीड हजार रुपये वितरित करण्याचे आदेश विकास आयुक्त (असंघटित कामगार) यांच्या यांना देण्यात आल्याचे मुश्रीफ यांनी सांगितले.
आतापर्यंत 9 लाख 17 हजार नोंदित बांधकाम कामगारांना अर्थसहाय्य करण्यात आले आहे. गेल्या वर्षीही कोरोना विषाणूच्या प्रादूर्भाव कालावधीत नोंदित बांधकाम कामगारांना प्रत्येकी 5 हजार रुपयांची मदत करण्यात आली होती, असेही मुश्रीफ यांनी सांगितले.
