गुवाहाटी (ओडिसा) : ज्या अंगणात आपण खेळलो, आई-बाबांनी लाड पुरवले, भावाबरोबर लुटूपुटचे भांडण केले, ते घर कायमचे सोडून जाताना मुलीला त्रास होतो. लग्न लागून नववधू पतीच्या घरी जायला लागली की आठवणींचे बांध फुटून डोळ्यावाटे झरू लागतात. पण जगरहाटी म्हणून अनेकजण काही वेळाने सावरतात. ओडिशामध्ये एक दु:खद घटना घडली आहे. नववधू पतीच्या घरी जाताना इतकी रडली की तिला ह्रदयविकाराचा धक्का बसला आणि तिचा जागीच मृत्यू झाला.
ओडिसाच्या सोनेपूर जिल्ह्यातील गुप्तेश्वरी साहू उर्फ रोझी असे मृत नववधूचे नाव आहे. शुक्रवारी रोझीचे लग्न होते आणि माहेरहून पाठवणी करताना ही ह्रदयद्रावक घटना घडली. काही महिन्यांपूर्वीच तिच्या वडिलांचेही निधन झाले होते. काही नातेवाईक आणि सामाजिक कार्यकर्त्यांनी तिचे लग्न ठरवले. त्या लग्नाचा खर्चही उचलला.
शुक्रवारी बालानगीर इथे राहणाऱ्या बिसीकेसन याच्यासोबत रोझीचं लग्न झालं. लग्नानंतर पाठवणीची वेळ आल्यापासूनच रोझीला रडू अनावर झाले. ती सतत रडू लागल्याने बेशुद्ध होऊन जमिनीवर कोसळली. नातेवाईकांनी तिच्या तोंडावर पाणी शिंपडून उठवण्याचा प्रयत्न केला पण तिला शुद्ध आली नाही. तिला तातडीने जवळच्या रुग्णालयात नेण्यात आले. मात्र, तिला डॉक्टरांनी मृत घोषित केले. शवविच्छेदनानंतर मृतदेह कुटुंबियांकडे सोपवण्यात आला. शोकाकूल वातावरणात तिच्यावर अंत्यसंस्कार करण्यात आले.
