मुंबई : अखेर शिक्कामोर्तब! नाना पटोलेंची काँग्रेसच्या प्रदेशाध्यक्षपदी निवड झाली आहे. विधानसभा अध्यक्षपदाचा नाना पटोले यांनी आपल्या पदाचा राजीनामा काल (ता.०४) दिला होता. त्यांचे नाव काँग्रेस प्रदेशाध्यक्षपदासाठी निश्चित झाल्याची माहिती समोर आली होती.
काँग्रेसने मुंबई अध्यक्ष पदावरुन एकनाथ गायकवाड यांना दूर करून आमदार भाई जगताप यांच्याकडे ही धुरा सोपविल्यानंतर प्रदेशाध्यक्ष पदही बदलाचे वारे काँग्रेसमध्ये जोरात वाहू लागले होते. आपले पद जाऊ नये यासाठी विद्यमान प्रदेशाध्यक्ष बाळासाहेब थोरात यांनी दिल्लीत आपली लॉबिंग सुरु केले. त्यामुळे थोरातच कायम राहतील, कशी काँग्रेसमध्ये चर्चा होती. मात्र, एक व्यक्ती- एक पद या तत्वामुळे काँग्रेसने थोरात यांचा राजीनामा घ्यायचे निश्चित केले होते.
या स्पर्धेत आतापर्यंत विजय वडेट्टीवार, नितीन राऊत या मंत्र्यांची नावे चर्चेत होती. मात्र प्रदेशाध्यक्षपद आणि मंत्रीपदही ठेवून आपण काम करू, अशी अट घातल्यामुळे त्यांच्या नावाचा विचार करण्यात आला नाही. तर पटोले यांनी स्वतःहून प्रदेशाध्यक्षपदाची इच्छा व्यक्त केल्याने त्यांचे नाव अंतिम करण्यात आले. यासाठीच पटोले यांनी आपल्या पदाचा राजीनामा दिला असल्याचे बोलले जात होते.
