नवी दिल्ली : संसद भवनातील गेट नंबर १ जवळील महात्मा गांधीजींचा पुतळा हलवण्याची तयारी सरकारी अधिकारी करत आहेत. गांधीजींची ध्यान मुद्रेतील ही मुर्ती विरोधकांच्या दृष्टीकोणातून अत्यंत महत्वाची आहे. कारण संसद सत्राच्यावेळी विरोधक याच पुतळ्याच्या खाली आपली आंदोलने करतात. आता त्यांची हक्काची आंदोलनाची जागा जाणार आहे.
हा गांधीजींचा पुतळा हलवण्यात येणार आहे. हटवण्यात येणार नाही. केंद्रीय आवास, शहर मंत्रालय आणि केंद्रीय लोक निर्माण विभागाच्या अधिकाऱ्यांनी सांगितले की सध्या गांधींजींची मूर्ती नव्या संसद भवन निर्माणासाठी हलवण्यात येणार आहे. एका अधिकाऱ्याने सांगितले की संसद प्रतिनिधींच्या हॉलजवळ गांधीजींच्या या पुतळ्याचे स्थान निश्चित करण्याचा निर्णय लोकसभा अध्यक्ष घेणार आहेत. तसेच संसदेची नवी इमारत ही साऊंड प्रुफ करण्यात येणार आहे.
गांधीजींचा १६ फुटी पुतळा हा संसद प्रतिनिधींचे एकत्र येण्याचे, आंदोलन करण्याचे आणि पत्रकार परिषद घेण्याचे हक्काचे स्थान आहे. प्रसिद्ध शिल्पकार रामसुतार यांनी या पुतळ्याची निर्मिती केली आहे. राज्यसभेच्या अधिकृत वेबसाईटनुसार शहर विकास मंत्रालयाने संसद भवनाला भेट दिलेल्या या पुतळ्याचे अनावरण २ ऑक्टोबर १९९३ ला तत्कालीन राष्ट्रपती डॉ. शंकर दयाल शर्मा यांनी केले होते.
