आज मध्यरात्रीपासून पंढरपुरात संचारबंदी

पंढरपूर : कार्तिक वारी यात्रेच्या पार्श्‍वभूमीवर कोरोनाचा संसर्ग रोखण्यासाठी पंढरपूर शहर व आजूबाजूच्या दहा गावांमध्ये आज मंगळवार, 24 रोजी रात्री 12 वाजल्यापासून ते 26 नोव्हेंबरच्या रात्री 12 वाजेपर्यंत संचारबंदी आदेश लागू करण्यात आले आहेत. याबाबतचे आदेश जिल्हाधिकारी मिलिंद शंभरकर यांनी आज जारी केले. दरम्यान, पोलिसांनी मंदिर परिसर व चंद्रभागा नदीवरील घाट बॅरेकेडिंग करून बंद केले आहेत. पोलिस बंदोबस्तही वाढवला असून 1700 पोलिस अधिकारी, कर्मचार्‍यांचा बंदोबस्त ठेवण्यात आला आहे.

कार्तिक वारीसाठी राज्यभरातून भाविक पंढरपूरमध्ये येत असतात. वारी कालावधीत पंढरपुरात भाविकांची गर्दी होऊन कोरोनाचा प्रादुर्भाव मोठ्या प्रमाणात वाढू शकतो. सार्वजनिक हिताच्यादृष्टीने संसर्ग टाळण्यासाठी प्रशासनाने पंढरपूर शहरात आणि शहराच्या आजूबाजूला असलेल्या भटुंबरे, चिंचोळी भोसे, शेगावदुमाला, लक्ष्मीटाकळी, गोपाळपूर, वाखरी, कोर्टी, गादेगाव, शिरढोण आणि कौठाळी या 10 ग्रामपंचायत हद्दीत साथरोग अधिनियम 1897, आपत्ती व्यवस्थापन अधिनियम 2005 नुसार 144 अंतर्गत संचारबंदीचे आदेश जारी केले आहेत.

कार्तिक वारी कालावधीमध्ये परंपरेनुसार साजरे होणारे उत्सव यांना स्थानिक परिस्थितीनुरुप परवानगी देण्याचे अधिकारी राखून ठेवण्यात आले आहेत. या आदेशाचे उल्लंघन करणारी व्यक्ती किंवा संस्था भारतीय दंडसंहितेच्या कलम 188 आणि आपत्ती व्यवस्थापन अधिनियम 2005 आणि इतर कायद्यानुसार कारवाई करण्यात येईल, असे या आदेशात नमूद करण्यात आले आहे.

भाविकांनी पंढरपूरमध्ये येऊ नये म्हणून त्रिस्तरीय पोलिस बंदोबस्त ठेवण्यात आला आहे. जिल्हास्तरीय, तालुकास्तरीय नाक्यावर तपासणी करण्यात येत असून त्याचबरोबर पंढरपूर शहरातही जागोजागी पोलिसांकडून तपासणी करण्यात येत आहे. जेणेकरुन या त्रिस्तरीय नाकाबंदीतून कोणीही पंढरपुरात पोहचू शकणार नाही. याकरिता 1700 पोलिस अधिकारी, कर्मचारी तैनात करण्यात आले आहेत.

श्री विठ्ठल-रुक्मिणी मंदिर परिसरातील सर्वच मार्ग बॅरेकेडिंग लावऊन बंद करण्यात आले आहेत. त्याचबरोबर चंद्रभागा स्नानास बंदी घालण्यात आल्याने चंद्रभागा किनारी असलेले सर्वच घाट बॅरेकेडिंग करुन बंद केले आहेत. येथे चोख पोलिस बंदोबस्त ठेवण्यात आला आहे. नदीपात्रातही पोलिस बंदोबस्त ठेवण्यात आला आहे. बससेवा वगळता इतर सर्व वाहतूक शहराबाहेर वळवण्यात आलेली आहे. संचारबंदीच्या काळात अत्यावश्यक सेवा असेल तरच नागरिकांना घराबाहेर पडता येणार आहे अन्यथा कारवाईला सामोरे जावे लागणार आहे.

दरम्यान, ऑनलाईन दर्शन बुकिंग पासधारकांना आज शुक्रवारी मुख दर्शनकरिता सोडण्यात येणार आहे. यानंतर मात्र 25 ते 27 पर्यंत मुख दर्शन बंद राहणार आहे. आज रात्री 12 वाजल्यापासून संचारबंदी लागू होणार आहे.

यांना संचारबंदीत आहे सवलत

* अत्यावश्यक वैद्यकीय सेवा पुरविणारी खासगी-सरकारी रुग्णालये, आरोग्य सेवा देणारे डॉक्टर व वैद्यकीय सेवेशी संबंधित कर्मचारी
* अ‍ॅम्ब्युलन्स सेवा आणि सारी, आयएलआय आणि कॉन्टॅक्ट ट्रेसिंगसंदर्भात सर्वेक्षण करणारे अधिकारी, कर्मचारी.
* जीवनावश्यक सेवेतील आस्थापना
* मंदिर समिती पंढरपूर यांच्याकडील पासधारक अधिकारी, कर्मचारी
* कर्तव्यावर असणारे महसूल, पोलिस, पाणीपुरवठा, अग्निशमक, विद्युतपुरवठा विभागातील शासकीय अधिकारी, कर्मचारी.
* पोलिस बंदोबस्तासाठी भोजनालय, पाणीपुरवठा सुविधा पुरवणार्‍या यंत्रणा.