अकोला- कोरोना विषाणू संसर्गाच्या पार्श्वभुमिवर देशातील लॉक डाऊन व त्यामुळे निर्माण झालेल्या परिस्थितीची हाताळणी करण्यासाठी संपूर्ण शासकीय यंत्रणेचे कामकाज सुरु होते. मंत्रालयस्तरावरुन विविध विभागांच्या व्हिडीओ कॉन्फरन्सेस घेऊन आढावे घेतले जात आहेत. जिल्हाधिकारी जितेंद्र पापळकर स्वतः कार्यालयात उपस्थित होते. त्यांनी आज शहरातील व्यापारी संघटनांची बैठक बोलावून जिल्ह्यात जीवनावश्यक वस्तूंचा तुटवडा भासू नये यासाठी करावयाच्या विविध उपाययोजनांचा आढावा घेतला.
तसेच या कालावधीत नागरिकांना निर्माण होणारे प्रश्न व अडचणी सोडविण्यासाठीही प्रशासकीय यंत्रणा कार्यरत होती. रेशनचे धान्य वितरण व अन्य व्यवस्थांची कामे सुरळीत करण्यासाठी यंत्रणा कार्यरत होती. आपत्ती व्यवस्थापन कक्ष ही निवासी उपजिल्हाधिकारी यांच्या कार्यालयात सुरु होता. तेथून वेळोवेळी विविध माहिती व आकडेवारी ही मंत्रालयस्तरावर पाठविली जाते. निवासी उपजिल्हाधिकारी संजय खडसे हे स्वतः सर्व अहवाल पाठविणे त्यासाठी माहितीचे संकलन करणे ही कामे करत होते. तसेच जिल्हाभरात घडणाऱ्या विविध घटनांवरही लक्ष ठेवून होते.
अधिक वाचा: कृषी यंत्रे व सुटे भाग, चहापत्ती उद्योग संचारबंदीतून वगळले