मुंबई : जागतिक बाजारातील नकारात्मक संकेत आणि नफेखोरांनी पु्न्हा एकदा नफावसुलीला प्राधान्य दिल्याने आज बुधवारी २२ जून २०२२ रोजी शेअर बाजारात घसरण झाली. सकाळच्या सत्रात सेन्सेक्स ५०० अंकांनी कोसळला. निफ्टीत १८० अंकांची घसरण झाली.
मुंबई शेअर बाजाराच्या मंचावर प्रत्येक दोन शेअरमध्ये घसरण झाली तर दोन शेअर वधारले. १३ शेअरने ५२ आठवड्यातील नीचांकी पातळी गाठली. ब्लुचिपमधील २३ शेअर घसरले आहेत. ज्यात बँका, आयटी, ऑटो, ऊर्जा आणि वित्त संस्थांच्या शेअरचा समावेश आहे. महिंद्रा, इंड्सइंड बँक, टायटन, मारुती, एसबीआय, विप्रो, टेक महिंद्रा, एचयूएल, नेस्ले, टीसीएस, एचडीएफसी बँक, एल अँड टी, इन्फोसिस, कोटक महिंद्रा बँक, एचडीएफसी, आयसीआयसीआय बँक या शेअरमध्ये घसरण झाली आहे.
डॉ. रेड्डी लॅब, पॉवरग्रीड, अल्ट्राटेक सिमेंट, एनटीपीसी, बजाज फायनान्स, बजाज फिनसर्व्ह या शेअरमध्ये वाढ झाली. निफ्टी मंचावर सर्वच क्षेत्रीय निर्देशांकात घसरण झाली. निफ्टीवर ओएनजीसी, आयडीएफसी बँक, पीएनबी बँक, वेदांता लिमिटेड, आरबीएल बँक, येस बँक या शेअरमध्ये घसरण झाली.
