मुंबई : मुंबईतील दोन रिअल इस्टेट समूहांवर 7 ऑक्टोबरला टाकलेल्या छाप्यांमध्ये अनेक संशयास्पद व्यवहार आणि 184 कोटी रुपयांची बेहिशेबी मालमत्ता उघडकीस आल्याची माहिती आयकर विभागाने शुक्रवारी दिली. या दोन्ही आस्थापना उपमुख्यमंत्री आणि राष्ट्रवादी काँग्रेसचे नेते अजित पवार यांच्या कुटुंबीयांशी संबंधित असल्याची चर्चा आहे. आयकर विभागाच्या प्रसिद्धिपत्रकात कोणाचेही नाव नमूद नसले, तरी अजित पवार यांच्या अडचणी वाढण्याची शक्यता आहे.
आयकर विभागाने 7 ऑक्टोबरला मुंबई, पुणे, बारामती, जयपूर आणि गोवा येथील तब्बल 70 ठिकाणांवर छापे टाकले होते.
हे व्यवहार संशयास्पद
मुंबईतील एका मोक्याच्या ठिकाणी असलेली कार्यालयीन इमारत, दिल्लीतील उच्चभ्रू भागातील आलिशान सदनिका, गोव्यातील एक रिसॉर्ट, महाराष्ट्रात वेगवेगळ्या ठिकाणी शेतजमिनीची खरेदी आणि साखर कारखान्यांमध्ये गुंतवणूक आदी व्यवहारांसाठी बेहिशेबी निधीचा वापर करण्यात आला. या मालमत्तांचे मूल्य सुमारे 170 कोटी रुपये आहे, असे आयकर विभागाच्या पत्रकात नमूद आहे.
