महाराष्ट्र्रात रोज धक्कादायक घटना उघडकीस येत असताना अशीच एक घटना कोल्हापूर इथे उघडकीस आली आहे . एका व्यक्तीने आपल्या बायकोला टच स्क्रीन मोबाइल घेऊन न दिल्याने संबंधित 19 वर्षीय विवाहितेनं वैफल्यातून आपल्या राहत्या घरात गळफास घेत आयुष्याचा शेवट केला. कोल्हापूर जिल्ह्याच्या पन्हाळा तालुक्यातील पोर्ले तर्फ ठाणे हद्दीत ही घटना घडलेली असून पन्हाळा पोलीस या घटनेचा पुढील तपास करत आहेत.
उपलब्ध वृत्तानुसार, फिर्यादी वैभव लोकरे यांचा एक वर्षांपूर्वी शाहूवाडी तालुक्यातील डोणोली येथील रहिवासी असणाऱ्या प्रियांकाशी विवाह झाला होता. वैभव हा गवंडी काम करत असून त्याची परिस्थिती अत्यंत गरिबीची आहे . कोरोनानंतर आर्थिक परिस्थिती आणखीनच खालावली त्यामुळे खूप दिवसापासून पत्नी हट्ट करत असून देखील वैभव यांना तिची मागणी पूर्ण करणे शक्य होत नव्हते. पत्नी प्रियांका वैभव यांना फिरायला घेऊन जाण्यास आणि टच स्क्रीन मोबाइल घेऊन देण्यासाठी हट्ट करत होती.
प्रियांका वैभव लोकरे यांनी या नैराश्यातून सोमवारी दुपारी घरात कुणी नसताना आपल्या राहत्या घरातील छताच्या छतास नॉयलॉन दोरीने गळफास घेत आत्महत्या केली . फक्त टच स्क्रीन मोबाइल न मिळाल्याने महिलेनं आत्महत्या केल्यानं गावात हळहळ व्यक्त केली जात आहे.प्रकरण उघडकीस आल्यानंतर पती वैभव यांनी पन्हाळा पोलीस ठाण्यात फिर्याद दाखल केली आहे. पोलिसांनी फिर्यादीचा जबाब नोंदवून घेतला असून या घटनेचा पुढील तपास पोलीस करत आहेत.
