ओतूर ओझर: (ता. जुन्नर, जि.पुणे) जुने गावठाण हद्दीत भरवस्तीमध्ये राहणाऱ्या शांताबाई बळवंत कवडे (वय ७०) व बळवंत बाबुराव कवडे (वय ७५) या वृद्ध जोडप्याला बुधवारी (दि.२५) रात्री साडेनऊच्या सुमारास तीन ते चार जणांच्या टोळक्याने धारदार शस्त्राचा धाक दाखवत मारहाण केली. बळवंत कवडे यांना घरामध्ये बांधून ठेवून त्यांची पत्नी शांताबाई कवडे यांच्या गळ्यातील व अंगावरील सव्वासात तोळे वजनाचे सोन्याचे दागिने पळवून नेत पोबारा केला.
ओझर येथे ही घटना घडते प्रसंगी बळवंत कवडे यांनी आरडाओरडा केल्याने त्यांना चोरट्यांनी कोयत्याने जबर मारहाण करून जखमी केले. या हल्ल्यात बळवंत कवडे यांच्या डोक्याला व खांद्याला दुखापत झाली आहे.
अशाप्रकारे भर वस्तीमध्ये एका वृद्ध दाम्पत्यावर शेजारी पाजारी लोक जागे असताना हल्ला होणे ही चिंतेची बाब बनली आहे.
या घटनेचा पुढील तपास जुन्नर विभागीय पोलीस अधिकारी मंदार जावळे यांच्या मार्गदर्शनाखाली ओतूरचे सहाय्यक पोलीस निरीक्षक परशुराम कांबळे करीत आहेत.
