नवी दिल्ली – देशातील कोरोनाविरोधातील लसीकरण मोहीमेला आता जोर धरू लागला आहे. १८ वर्षांवरील सर्व नागरिकांचे लसीकरण तर वेगात सुरू आहेच. पण आता लवकरच १८ वर्षांखालील मुलांचे लसीकरणही सुरु करण्यात येणार असल्याची माहिती केंद्र सरकारने दिली आहे. देशात सध्या १८ वर्षांखालील मुलांवर लसीच्या चाचण्या करण्यात येत आहेत आणि त्या आता पूर्णत्वाच्या मार्गावर आहेत.
आज दिल्ली उच्च न्यायालयाला केंद्र सरकारने याबद्दलची माहिती दिली. सध्या लसीच्या १८ वर्षांखालील मुलांवर चाचण्या सुरू आहेत. पण, त्या लवकरच पूर्ण होतील. त्या पूर्ण झाल्या आणि तज्ज्ञांनी लसीकरणाची मान्यता दिली की लगेचच १८ वर्षांखालील मुलांच्या लसीकरणासाठीचे नियोजन करण्यात येईल आणि या लसीकरण मोहिमेलाही लगेचच सुरुवात करण्यात येईल, असे केंद्र सरकारने दिल्ली उच्च न्यायालयाला सांगितले.
१२ ते १८ वयोगटातील मुलांना आणि त्यांच्या पालकांना प्राधान्याने कोरोना प्रतिबंधक लस द्यावी, अशी याचिका एका १२ वर्षीय बालकाने आपल्या आईच्या माध्यमातून आणि एका ८ वर्षांच्या मुलाच्या आईने दिल्ली उच्च न्यायालयात दाखल केली होती. केंद्र सरकारने या याचिकेला उत्तर देताना ही माहिती दिली आहे. सरन्यायाधीश डी.एन पटेल आणि न्यायमूर्ती ज्योती सिंग यांच्या विभागीय खंडपीठाने आज सांगितले की, लहान मुलांसाठीच्या लसीकरणाची संपूर्ण देश वाट पाहत आहे. न्यायालयाने केंद्र सरकारला अजून थोडा वेळ दिला असून पुढील सुनावणी ६ सप्टेंबरला होणार असल्याचे आदेश दिले आहेत.
दरम्यान यावेळी न्यायालयाने लसीच्या चाचणी प्रक्रियेला वेळेची मर्यादा घालून द्यावी या मागणीला धुडकावून लावले आहे. संशोधनाला वेळेची मर्यादा घालून चालणार नसल्याचे स्पष्टीकरण न्यायालयाने दिले. लस मिळवण्याच्या घाईत प्रत्येकजण आहेत. मात्र, जर योग्य चाचण्या झाल्या नाहीत, तर मोठे संकट निर्माण होईल, असे न्यायालयाने स्पष्ट केले आहे.
