अमरावती : शहरातील एका अल्पवयीन प्रेमीयुगुलाने जवळच असलेल्या जंगलात गळफास लावून आत्महत्या केली. महादेव खोरी परिसराजवळील जंगलात ही घटना गुरुवारी (दि. २०) सायंकाळी उघडकीस आली. या घटनेमुळे परिसरात एकच खळबळ उडाली आहे.
महादेव खोरी येथील महादेव मंदिरावरील वरच्या बाजूला जंगल परिसर आहे. तेथील सागवानच्या एका झाडावर प्रेमीयुगलाचा मृतदेह आढळून आला. या घटनेच्या माहितीवरून फ्रेजरपुरा पोलिसांनी घटनास्थळी धाव घेतली. पोलिसांनी पंचनामा केला असता, आत्महत्या करणा-या जोडपे अल्पवयीन असल्याची माहिती पुढे आली आहे. तीन दिवसांपासून ते बेपत्ता होते. यासंदर्भात फ्रेजरपुरा आणि राजापेठ पोलिस ठाण्यात मिसींगची तक्रार नोंदविण्यात आली होती.
तीन दिवसांपूर्वी आत्महत्या केल्याचा अंदाज
घटनेच्या माहितीवरून फ्रेजरपुर्याचे ठाणेदार पुंडलिक मेश्राम, पीएसआय गजानन सोनुने यांचे पोलिस पथक घटनास्थळी पोहोचले. झाडाझुडुपातील अडचणीच्या ठिकाणी ही आत्महत्येची घटना घडल्याने पोलिसांनी घटनास्थळी पोहोचण्यात बरीच अडचण निर्माण झाली होती. त्यातच मृतदेहाची दुर्गंधी पसरल्यामुळे या प्रेमीयुगुलाने दोन ते तीन दिवसांपूर्वी आत्महत्या केली असावी, असा अंदाज पोलिसांनी काढला. रात्री उशिरापर्यंत झाडावरील मृतदेह खाली काढण्याचे प्रयत्न सुरू होते. गुरुवारी रात्री उशिरापर्यंत पोलिसांची पुढील कारवाई सुरू होती.
