दिल्लीच्या छत्रसाल स्टेडियमवर कुस्तीपटूंच्या दोन गटात झालेल्या हाणामारीत कुस्तीपटू सागर धनकडच्या मृत्यूप्रकरणी दिल्ली पोलिसांनी दोन वेळा ऑलिम्पिक पदकविजेते सुशीलकुमार विरोधात लूक आउट नोटीस बजावली आहे. कुस्तीपटूंच्या दोन गटात झालेल्या भांडणात कुस्तीपटू सागर धनकडच्या मृत्यूप्रकरणी सुशील कुमार आणि त्याच्या साथीदारांचा अद्यापपर्यंत कोणताही सुगावा लागलेला नाही. ते देश सोडून जाऊ नये यासाठी दिल्ली पोलिसांनी लूक आऊट नोटीस जारी केली आहे.
या प्रकरणाच्या तपासादरम्यान पोलिसांनी घटनेच्या दिवशी सागरचे दोन सहकारी असलेल्या जखमी कुस्तीपटू रवींद्र आणि भगत सिंग यांचेही जबाब नोंदवले आहेत. अपहरण आणि हल्ला केल्याच्या प्रकरणात या दोघांनीही सुशीलचे नाव घेतले आहे. यानंतर सुशीलच्या अडचणी वाढल्या आहेत.
पोलिस अधिकाऱ्यांचे म्हणणे आहे की चौकशीसाठी सुशील कुमार व इतर कुस्तीपटूना घराकडे कायदेशीर नोटीस पाठवल्या गेल्या आहेत. या प्रकरणाचा तपास करणाऱ्या एका पोलिस अधिकाऱ्याने सांगितले की, फ्लॅटवरून सुशील आणि बाकी कुस्तीपटू यांच्यात भांडणे झाल्याचे स्पष्ट आहे. तपासणी दरम्यान मंगळवारी घटनेच्या दिवशी मॉडेल टाऊनमधील सुशील गट आणि सागरच्या गटामध्ये भांडण झाले होते.
यानंतरच रात्री घटना घडली. याप्रकरणी अटक करण्यात आलेल्या प्रिन्स दलालच्या मोबाइलशिवाय उर्वरित पाच कारचीही पोलिसांनी एफएसएल चौकशी केली आहे. रविवारी पोलिस पथकाने सुशील आणि त्याच्या साथीदारांचा दिल्ली-एनसीआर व्यतिरिक्त उत्तर प्रदेश, हरियाणा, राजस्थान आणि उत्तराखंडमध्ये शोध घेतला, पण सुशीलचा कोणताही थांगपत्ता लागलेला नाही.
दोन गटामध्ये झालेल्या भांडणात सागर, अमित आणि सोनू गंभीर जखमी झाले. नंतर उपचारादरम्यान सागरचा मृत्यू झाला. जखमीने सुशीलचे नाव घेतले होते. याशिवाय अटक आरोपी प्रिन्स दलाल याच्या मोबाईलवरून सुशीलचे काही व्हिडिओही सापडले होते, ज्यात सुशील मारहाण करताना दिसला होता.
