मुंबई : १८ ते ४४ वयोगटातील नागरिकांना मोफत लस देण्याचा निर्णय आज बुधवारी राज्य मंत्रिमंडळाच्या बैठकीत घेण्यात आला. पण लसींच्या कमतरेमुळे १ मे पासून हे मोफत लसीकरण सुरु करता येणार नाही, असे राज्याचे आरोग्यमंत्री राजेश टोपे यांनी आज स्पष्ट केले. याचाच अर्थ १८ ते ४४ वयोगटातील लसीकरण लांबणीवर पडले आहे.
सरकारी दवाखान्यात लस मोफत मिळेल. पण खासगी दवाखान्यात तुम्हाला लस विकत घ्यावी लागेल. मोफत लसीकरणासाठी २ कोटी डोसेस विकत घ्यावे लागतील. त्यासाठी ६ हजार ५०० कोटी रुपये खर्च येईल. या खर्चाला राज्य शासनाने मंजुरी दिली असल्याची माहिती टोपे यांनी दिली.
अगोदर नोंदणी करुनच केंद्रावर लस घेण्यासाठी जावे लागेल. थेट केंद्रावर येऊन लसीकरण होणार नाही. सबुरीने आणि समंजसपणाने काम करावे लागेल, असे आरोग्यमंत्री टोपे यांनी स्पष्ट केले आहे.
सध्या कोव्हिशिल्ड आणि कोवॅक्सिन या लसी उपलब्ध होतील. कोव्हिशिल्डचे १ कोटी डोस प्रतिमहिना देऊ असे आम्हाला कंपनीने कळविले आहे. पण कोव्हॅक्सिन खूप कमी प्रमाणात मिळत आहे. त्यासाठी रशियाच्या स्फुटनिक लसीचा लसीकरणात अंतर्भाव करता येईल. झायडस कॅडिला आणि जॉन्सन अँड जॉन्सन या लसीदेखील उपलब्ध होतील, असे टोपे यांनी सांगितले.
राज्यातील १८ ते ४४ वयोगटातील सर्व नागरिकांचे मोफत लसीकरण…
राज्यातील १८ ते ४४ या वयोगटातील सर्वांना कोविड प्रतिबंधात्मक लस मोफत देण्याचा निर्णय आज झालेल्या राज्य मंत्रिमंडळाच्या बैठकीत घेण्यात आला. बैठकीनंतर मुख्यमंत्री उद्धव ठाकरे यांनी याची घोषणा केली. लसीकरण कार्यक्रमाबाबत आरोग्य विभाग नियोजन करीत असून नागरिकांना याबाबत व्यवस्थित पूर्वसूचना देण्यात येईल, त्यामुळे लसीकरण केंद्रांवर अनावश्यक गर्दी करू नये असेही मुख्यमंत्र्यांनी स्पष्ट केले.
यावेळी बोलताना मुख्यमंत्री ठाकरे म्हणाले की, गेल्या वर्ष-सव्वा वर्षांपासून आपण कोविडची लढाई लढतो आहोत. जानेवारीपासून केंद्राच्या सहकार्याने राज्यात लसीकरण सुरु आहे. आजतागायत ४५ च्या पुढील वयोगटातील दीड कोटीपेक्षा जास्त जणांचे लसीकरण करण्यात आले आहे. हा देशात विक्रम आहे.
लस पुरवठ्याप्रमाणे लसीकरण कार्यक्रम घोषित करणार
उपमुख्यमंत्री अजित पवार, महसूल मंत्री बाळासाहेब थोरात, आरोग्यमंत्री राजेश टोपे तसेच इतर सर्व प्रमुख सहकाऱ्यांशी यासंदर्भात चर्चा झाली आहे. सध्या राज्यसमोर आर्थिक चणचण असूनही नागरिकांच्या आरोग्याला सर्वोच्च प्राधान्य आहे त्यामुळेच १८ ते ४४ च्या वयोगटातील सर्वांना मोफत लस देण्याचा निर्णय राज्य मंत्रिमंडळाच्या बैठकीत घेण्यात आला असून लसींचा पुरवठा कसा होतो, यानुसार लसीकरण नियोजन करून पुढील कार्यक्रम जाहीर करण्यात येईल, असेही मुख्यमंत्र्यांनी म्हणाले.
जास्तीत जास्त लस मिळविण्याचे प्रयत्न
सध्या सीरम आणि भारत बायोटेक या कंपन्यांच्या लसी उपब्ध असून, त्यांच्याशी सातत्याने चर्चा करून, पाठपुराव्याने जास्तील जास्त लस उपलब्ध करून देण्यात येईल.
उत्तम नियोजन करावे
१८ ते ४४ वयोगटातील लसीकरण कार्यक्रमाचे नियोजन करताना कुठलीही अडचण येणार नाही याची काळजी घेण्याची मुख्यमंत्र्यांनी प्रशासनाला सूचना केली आहे
कोविन ॲपवर नोंदणी करा
या वयोगटातील नागरिकांनी कोविन मोबाईल ॲपवर नोंदणी करावी, कुठेही लसीकरण केंद्रांवर गर्दी करू नये. लसीकरणाबाबत व्यवस्थित व सुस्पष्ट सूचना मिळतील, असेही मुख्यमंत्री ठाकरे यांनी म्हटले आहे.
