बदलापूर : वांगणी रेल्वे स्थानकात आई आणि मुलासह चाललेल्या एक लहान मुलगा रेल्वे प्लेटफॉर्मवरून खाली पडला. याचवेळी कर्जतहून मुंबईच्या दिशेने वेगवान मेलगाडी येत होती. या घटनेत अवघ्या वीस सेकंदात पॉईंट मॅन मयुर शेळके यांनी दाखविलेल्या सतर्कपणामुळे मुलाचा जीव वाचण्यात यश मिळाले. ही घटना सीसीटीव्ही कॅमेऱ्यात कैद झाली आहे.
मयुर शेळके हे मेलगाडी गाडीला सिग्नल देण्यासाठी स्टेशनच्याविरुद्ध दिशेला उभे होते. या वेळी आईसोबत चाललेला एक मुलगा रेल्वे प्लेटफॉर्मवरुन खाली पडल्याचे त्‍यांच्‍या निदर्शनास आले. (ही महिला अंध आहे). त्यांनी प्रसंगावधान राखत या मुलाच्या दिशेने धाव घेतली. या मुलाला उचलून स्टेशनवर आणले. त्यानंतर अवघ्या ५ सेकंदात मेलगाडी या ठिकाणाहून गेली.
ही घटना सीसीटीव्हीत कैद झाली असून मयुर शेळके यांनी दाखवलेल्या या धाडसाचे आणि कार्यतत्परतेचे सर्वत्र कौतुक होत आहे. सतर्कता आणि कर्तव्यदक्षतेबद्दल राज्य शासन व रेल्वेने महेंद्र शेळके यांचा यथोचित सन्मान करावा, अशी मागणी शिवसेनेचे उपजिल्हाप्रमुख एकनाथ शेलार यांनी केली आहे.
