महाराष्‍ट्र लोकसेवा आयोग दुय्यम सेवा संयुक्‍त (पुर्व) परीक्षा: ३३ उपकेंद्र परिसरात दि.११ रोजी प्रतिबंधात्मक आदेश

अकोला – महाराष्‍ट्र लोकसेवा आयोगातर्फे महाराष्‍ट्र लोकसेवा आयोग दुय्यम सेवा संयुक्‍त (पुर्व) परीक्षा – २०२० चे रविवार दि. ११ रोजी होणार आहे. त्यासाठी जिल्ह्यातील पात्र परीक्षार्थींची परीक्षा अकोला शहरातील  एकुण ३३ उपकेंद्रावर सकाळी ११ वाजेपासून होणार आहे.

या परीक्षा केंद्रावर गैरप्रकार होवू नये, तसेच कायदा व सुव्‍यवस्‍थेचा प्रश्‍न निर्माण होवू नये  या करीता सर्व ३३ परीक्षा उपकेंद्राच्या १०० मिटर परिसरात रविवार दि.११ रोजी सकाळी सहा ते सायंकाळी आठ वाजेपर्यंत प्रतिबंधात्मक आदेश जारी करण्यात आले आहेत.

जिल्हाधिकारी जितेंद्र पापळकर यांनी हे आदेश निर्गमित केले असून  या परीक्षा केंद्रावर या कालावधीत परीक्षा केंद्र परिसरात पाच पेक्षा अधिक व्यक्ती एकाच वेळी एकत्रितरीत्‍या प्रवेश करण्यास व घोषणा  देण्यास मनाई करण्यात आली आहे. परीक्षा केंद्राच्‍या परिसरात परीक्षार्थी अथवा अन्‍य व्‍यक्‍तींकडून शांततेस बाधा निर्माण होईल असे कोणतेही कृत्‍य करता येणार नाहीत.  परीक्षा केंद्राच्‍या १०० मीटर परिसरातील झेरॉक्‍स सेंटर, फॅक्‍स मशीन, पानपट्टी, लॅपटॉप, टायपिंग सेंटर एसटीडी बुथ, ध्‍वनीक्षेपक, इत्‍यादी माध्‍यम परीक्षा संपेपर्यंत बंद ठेवण्‍यात येतील. परीक्षा केंद्राचे परिसरात इंटरनेट, मोबाईल फोन, सेल्‍युलर फोन, ई मेल व इतर प्रसार माध्‍यमे घेवून प्रवेश करण्‍यास मनाई आहे.परीक्षा केंद्रावर कोणत्‍याही अनाधिकृत व्‍यक्‍ती व  वाहनास प्रवेशाची मनाई राहील.

या प्रतिबंधात्मक आदेशातून परीक्षा केंद्रावर नियुक्‍त अधिकारी/ कर्मचारी/परीक्षार्थी तसेच परीक्षा केंद्रावर देखरेख करणारे अधिकृत अधिकारी, कर्मचारी व पोलीस अधिकारी यांना परीक्षा संबंधित कर्तव्‍य पार पाडण्‍याचे दृष्‍टीने लागू राहणार नाहीत,असेही आदेशात स्पष्ट करण्यात आले आहे.

कोविड पार्श्वभुमिवर खालील सुचनाही देण्यात आल्या आहेत.

यावेळी परीक्षा केंद्रावर प्रवेश करणाऱ्या सर्व परीक्षार्थी / अधिकारी / कर्मचाऱ्यांचे थर्मल / इफ्रारेड थर्मामिटरव्‍दारे तापमान तपासण्‍यात यावे. हवा खेळती रहावी यासाठी परीक्षा केंद्रावरील सर्व खिडक्‍या तसेच दरवाजे उघडया ठेवाव्‍या.सर्व अधिकारी / कर्मचारी तसेच परीक्षार्थी यांना मास्‍कचा वापर करणे बंधनकारक राहिल. मास्‍क लावल्‍याशिवाय प्रवेश देण्‍यात येवू नये. प्रत्‍येक परीक्षार्थी मध्‍ये किमान तीन फुटाचे अंतर राहील, अशी बैठक व्‍यवस्‍था करण्‍यात यावी. परीक्षा केंद्राचे प्रवेशव्‍दारासमोर सॅनिटायझरची व्‍यवस्‍था करण्‍यात यावी. परीक्षा केंद्राच्‍या परिसराचे सोडियम हायपोक्‍लोराईटच्‍या सहाय्याने निर्जंतुकीकरण करण्‍यात यावे. कोणत्‍याही परीक्षार्थी / अधिकारी / कर्मचारी यांना कोव्हिड-१९ ची लक्षणे दिसून आल्‍यास तात्‍काळ नजीकच्‍या रूग्‍णालयात भरती करावे.

परीक्षा उपक्रेंद्रांची यादी-