चंद्रपूर : बहिणीला वराकडून पहाणी करण्यासाठी आलेल्या छोटे खाणी कार्यक्रमात आपल्याला बोलावले नाही म्हणून संतापलेल्या मुलानेच बापाला बांबूच्या काठीने बेदम मारहाण करून हत्या केल्याची घटना उघडकीस आली असून याघटनेने परिसरात एकच खळबळ उडाली आहे. ही घटना चिमूर तालुक्यातील चक लोहारा येथे काल दूपारी (४ मार्च) अडीच वाजण्याच्या सुमारास घडली. सिद्धार्थ रामदास सवाईकर (वय ४९) असे मृत वडीलांचे नाव असून सुखदेव सिद्धार्थ सवाईकर असे आरोपी मुलाचे नाव आहे. या घटनेनंतर तालुक्यात हळहळ व्यक्त होत आहे.
वडिल सवाईकर हे परिवारापासून वेगळे राहात होते. त्यांना मुलगी असल्याने त्यांनी यावर्षी तिचे लग्न आटोपण्याचे ठरविले होते. त्यामुळे ते वर मुलांना मुलगी दाखवत होते. यादरम्यान काल बुधवारी दुपारच्या सुमारास मुलीला पाहण्यासाठी बाहेर गावावरून वर मुलगा आणि त्यांचेकडील मंडळी आले होते. त्यांच्यासाठी घरात छोटेखाणी कांदे-पोहे कार्यक्रम ठेवण्यात आला होता. मात्र मुलगा सिध्दार्थचे आपल्या वडिलांसोबत पटत नसल्याने तो विभक्त राहत असल्याने त्याला बोलविण्यात आले नाही.
यावेळी सिध्दार्थला बहिणीला पाहण्यासाठी वर मुलगा आला असल्याची माहिती मिळाली. ही माहिती मिळताच त्याने वडिलांचे घर गाठले आणि पाहुण्यांसमोरच वर मुलाला शिवीगाळ करणे सुरु केले. त्यामुळे वडील आणि मुलामध्ये भांडण सुरू झाले. भांडण वाढून त्याचे पर्यवसन मारहाणीत झाले.
यावेळी मुलाने रागाच्या भरात वडिलांना बांबूच्या काठीने बेदम मारहाण केली. जखमी होवून रक्ताच्या थारोळ्यात पडलेल्या सवाईकर यांना तातडीने उपचारासाठी दवाखान्यात नेण्यात आले. मात्र वाटेतच वडिलाचा मृत्यू झाला. यानंतर ताराचंद रामदास सवाईकर यांनी याप्रकरणी पोलिस स्टेशनला माहिती दिली. यानंतर मुलगा सुखदेव सिद्धार्थ सवाईकर (वय २०) याच्यावर गुन्हा दाखल करण्यात आला असून त्याला अटक करण्यात आली आहे.
या घटनेची माहिती मिळताच चिमूरचे उपविभागीय पोलिस अधिकारी नितीन बगाटे यांनी घटनास्थळाला भेट दिली. तर त्यांच्या मार्गदर्शनात भिसी पोलिस स्टेशनचे पोलिस निरीक्षक मनोज गभणे यांच्या नेतृत्वात सहाय्यक पोलिस निरीक्षक विनोद जांभळे तपास करत आहेत.
