शेतीसाठी सात-बारावर आणि घरासाठी नमुना नंबर आठवर पती व पत्नीचे नाव लावण्यात येणार आहे. ग्रामविकास विभागामार्फत येत्या 8 मार्च या जागतिक महिला दिनापासून राबविण्यात येणार्‍या महासमृद्धी महिला सक्षमीकरण अभियानांतर्गत हा उपक्रम राबविण्यात येणार आहे, अशी माहिती ग्रामविकासमंत्री हसन मुश्रीफ यांनी दिली.
या अभियान काळात शासनाच्या विविध योजना महिलांपर्यंत पोहोचवून त्याचा त्यांना लाभ मिळवून देण्यात येणार आहे. यामध्ये प्रामुख्याने महिला बचत गटांना प्रदर्शने तसेच सहकारी आणि कॉर्पोरेट मॉलमध्ये उत्पादनांच्या विक्रीची संधी उपलब्ध करून देणे, तंबाखूमुक्‍ती, मशेरीमुक्‍ती, तपकीरमुक्‍ती आदींबाबत जनजागृती करणे, महिलांचे उपजीविकेचे स्रोत वाढविणे, महिलांना पायाभूत प्रशिक्षण व उद्योजकता विकासासाठी कौशल्य प्रशिक्षण देणे आदी उपक्रम राबविण्यात येणार आहेत.
महासमृद्धी महिला सक्षमीकरण अभियानामध्ये शासनाच्या संबंधित सर्व विभागांचा सहभाग घेतला जाईल. अभियानातून बचत गट, ग्रामसंघ आणि प्रभागसंघाच्या माध्यमातून महिलांच्या सक्षम संस्था निर्माण करण्यात येतील. महिलांचे उपजीविकेचे स्रोत वाढविण्यासाठी निधी आणि कर्ज उपलब्धतेसाठी मदत करण्यात येईल. शासनाचे विविध विभाग, कार्यालये, संस्था, पंचायतराज संस्था यांना आवश्यक असणार्‍या वस्तूंची खरेदी ही बचत गटांकडून होण्यासाठी सामंजस्य करार केले जातील. शासकीय कार्यालये आणि आवारामधील उपहारगृहे बचतगटांना चालविण्यासाठी देणे, बचत गटांना उद्योग आधार व अन्‍न परवाना मिळवून देणे आदीसाठी प्रयत्न करण्यात येतील, असेही ते म्हणाले.
