अकोला – कोरोना विषाणू प्रतिबंधात्मक उपाययोजने अंतर्गत जिल्ह्यात 31 जानेवारीपर्यंत आदेश लागू करण्यात आले होते. महाराष्ट्र शासनाच्या मार्गदर्शक सूचनेनुसार हे आदेश कायम ठेवण्यात आले असून त्याची मुदत दि. 28 फेब्रुवारीपर्यंत वाढविण्यात आली असल्याचे जिल्हाधिकारी जितेंद्र पापळकर यांनी आदेशाव्दारे कळविले आहे.
जिल्ह्यातील शहरी व ग्रामीण भागाकरिता आदेश निर्गमित
यापूर्वी देण्यात आलेले आदेशातील दिशानिर्देश 28 फेब्रुवारी पर्यंत कायम ठेवण्यात येत आहेत, तसेच ज्या आस्थापना व उपक्रमांना यापूर्वी निर्गमित केलेल्या आदेशान्वये वेळोवेळी परवानगी देण्यात आलेली आहे त्या आस्थापना व उपक्रम 28 फेब्रुवारी पर्यंत जशे सुरु आहेत तसेच सुरु राहतील, सर्व प्रकारच्या अत्यावश्यक सेवा अंतर्गत असलेली दुकाने व आस्थापना तसेच इतर दुकाने व आस्थापना यांना यापूर्वी सकाळी नऊ ते रात्री नऊ वाजेपर्यंत सुरु ठेवणे बाबत परवानगी देण्यात आली होती. ती आता 28 फेब्रुवारी पासून सकाळी नऊ ते रात्री 10.00 वाजेपर्यंत सुरु ठेवण्याबाबत परवानगी देण्यात येत आहे, कंटेन्टमेंट झोन क्षेत्राच्या बाहेरील क्रिडा स्पर्धेचे आयोजन, बैठक, विविध क्रिडा उपक्रमांचे आयोजन करणाऱ्या विविध संस्थांना ज्यामध्ये राज्य, राष्ट्रीय व आंतरराष्ट्रीय स्तरावरील खेळाडू प्रशिक्षण घेतात अशा संस्थांना 1 फेब्रुवारी 2021 पासून सुरु करण्याकरिता परवानगी देण्यात येत आहे. यामध्ये अकोला जिल्ह्यामध्ये सुरु असलेल्या विविध क्रिडा प्रशिक्षण संस्थाचा समावेश असेल या बाबत क्रिडा युवक व युवक कल्याण संचालनालय यांनी स्वतंत्रपणे निर्गमित केलेल्या मानक कार्यप्रणालीचे अनुपालन करणे बंधनकारक राहील.
कंटेन्टमेंट झोन क्षेत्राच्या बाहेरील विविध प्रकारच्या शासकीय प्रशिक्षण संस्था उदा. यशदा, वनामती, मित्र, मेरी ई. यांना त्यांचे प्राशिक्षण संस्थाद्वारे प्रशिक्षण सुरु करता येतील. या बाबत संबंधीत प्रशासकीय विभाग यांनी याबाबत स्वतंत्रपणे निर्गमित केलेल्या मानक कार्यप्रणालीचे अनुपालन करणे बंधनकारक राहील, सर्व प्रकारची खाजगी शैक्षणिक प्रशिक्षण केन्द्रे, खाजगी शिकवणी वर्ग, कोचिंग क्लासेस यांना त्यांचे वर्ग 1 फेब्रुवारी 2021 पासून सुरु करण्याकरिता परवानगी देण्यात येत आहे. खाजगी शैक्षणिक प्रशिक्षण केन्द्रे, खाजगी शिकवणी वर्ग, कोचिंग क्लासेस यांनी त्यांचे वर्ग सुरु करतांना प्रत्येक बॅचमध्ये नियमीत आसन क्षमतेच्या 25 टक्के किंवा जास्तीत जास्त 20 विद्यार्थी राहतील तसेच दोन बॅचच्या मध्ये अर्धा तासाचा अवकाश ठेवून प्रत्येक वेळी हॉल व रुमचे तसेच संगणक साहीत्याचे निर्जंतुकीकरण करणे बंधनकारक राहील, कोविड-19 चे अनुषंगाने केन्द्र शासन व राज्य शासन यांनी वेळोवेळी दिलेल्या निर्देशांचे तंतोतंत पालन करणे बंधनकारक राहील, या कार्यालयाने वेळोवेळी निर्गमित करण्यात आलेल्या विविध आदेशांचे उल्लंघन होणार नाही याची संबंधीत संचालकांनी व संस्थेने दक्षता घेण्यात यावी.
हे आदेश दि. 28 फेब्रुवारीच्या मध्यरात्रीपर्यंत संपूर्ण अकोला शहर व जिल्ह्यातील शहरी व ग्रामीण भागाकरीता लागू राहतील, असे आदेशात नमूद करण्यात आले आहे.
