नवी दिल्ली : जीवनातील फक्‍त 20 महिने जगलेल्या धनिष्ठा या चिमुकलीने तिच्या मृत्यूनंतर, 5 लोकांचा जीव वाचवून ‘जिंदगी लंबी नहीं, बडी होनी चाहिये,’ या ‘आनंद’ चित्रपटातील अमर संवादावर मोहर उमटविली आहे. अर्थात, धनिष्ठाच्या मृत्यूचे दु:ख आभाळाएवढेच; पण ती एका वेगळ्या अर्थाने अमर झाली आहे. तिच्यामुळे 5 बालकांना जीवनदान मिळाले आहे.
दिल्लीतील रोहिणी परिसरातील धनिष्ठा 8 जानेवारीला सायंकाळी खेळता-खेळता पहिल्या मजल्यावरील बाल्कनीतून खाली पडली. उपचारादरम्यान 11 जानेवारी रोजी डॉक्टरांनी तिला ‘ब्रेन डेड’ घोषित केले. धनिष्ठा तिच्या आयुष्यात फक्‍त 20 महिने जगली. धनिष्ठाचे हृदय, किडनी, लिव्हर आणि दोन्ही कॉर्नियांमुळे 5 बालकांना नवजीवन मिळाले आहे. मेंदूवगळता धनिष्ठाचे सर्व अवयव काम करत होते. ते सारे अवयव इतर 5 चिमुरड्यांचा जीव वाचविण्यात कामी आले.
अवयवदान, देहदान अन् देशातील स्थिती
अवयव न मिळाल्याने दरवर्षी भारतामध्ये 5 लाख जणांचा मृत्यू होतो.
भारतात केवळ .26 टक्के अवयवदान केलेे जाते. ते वाढायला हवे.
20 हजार रुग्ण आज लिव्हर ट्रान्स्प्लांटच्या प्रतीक्षेत आहेत.
10 लाखांमागे दक्षिण भारतात 1, तर उत्तर भारतात 0.01 देहदान होते.
