नागपूर : राज्याचे शिक्षण राज्यमंत्री बच्चू कडू यांना मुंबईत जाण्यापासून पोलिसांनी आज (मंगळवार) नागपुरातच रोखून धरले आहे. सकाळी ९ वाजून १५ मिनिटांच्या विमानाने बच्चू कडू नागपूर विमानतळावरून मुंबईत जाण्याकरिता निघाले होते. मात्र अचानक पोलिसांचा फौजफाटा बच्चू कडू थांबले होते त्या पाटबंधारे विभागाच्या विश्रामगृहावर पोहोचला आणि त्यांना विमानतळावर जाण्यापासून रोखून धरले.
या संदर्भात बच्चू कडू सुध्दा अनभिज्ञ होते. विमानतळावर जाण्यापासून बच्चू कडू यांना थांबवा असे आदेश मुंबईतून आल्यानेच त्यांना थांबविण्यात आल्याची माहिती पोलिसांनी दिली आहे. राज्यात महाविकास आघाडीचे सरकार असताना राज्याच्या मंत्र्यालाच मुंबईत येण्यापासून रोखण्यात आल्याची घटना घडली आहे. मुंबईत मंगळवारी रिलायन्सवर मोर्चाचे आयोजन करण्यात आले आहे. या मोर्चात सहभागी होण्यासाठी बच्चू कडू मुंबईत जात असल्याने त्यांना रोखण्यात आल्याची माहिती सुत्रांनी दिली आहे.
