झारखंड येथील दुमका जिल्ह्यातील एक भयानक घटना समोर आली आहे. पाच मुलांची आई असलेल्या महिलेवर तिच्या पतीला ओलीस ठेवत १७ नराधमांनी सामुहिक बलात्कार केला असल्याचा आरोप पीडित महिलेने केला आहे. ही घटना राज्याची राजधानी रांचीपासून ३०० किलोमिटरवर असलेल्या दुमका येथे घडली. पीडित महिलेने बुधवारी याबाबत पोलिस ठाण्यात तक्रार दाखल केली.
या प्रकरणी पोलिसांनी १७ जणांविरुद्ध एफआयआर नोंदवली, यात पीडितेच्या ओळखीतल्या व्यक्तीचाही समावेश आहे. दरम्यान, या प्रकरणाचे गांभीर्य पाहून संथल विभागाचे डीआयजी सुदर्शन मंडल आणि डुमकाचे एसपी अंबर राक्रा यांनी तपासासाठी पीडितेच्या गावाला भेट दिली. ही घटना मंगळवारी रात्री मफसील पोलिस ठाण्याच्या हद्दीत घडली. पीडित महिला आणि तिचा पती आठवडी बाजारातून परत येत असताना ही घटना घडली.
डीआयजी मंडल यांनी ‘महिलेने दिलेल्या वक्तव्यानुसार, मंगळवारी रात्री ती तिच्या पतीबरोबर गावच्या आठवडी बाजारातून परतत होती. दरम्यान, १७ लोकांनी तिला थांबवले आणि तिच्या पतीला ओलीस ठवले. त्यानंतर त्या सर्वांनी दुष्कर्म केले.’ असे सांगितले.
मंडल यांनी पुढे सांगितले की या ३५ वर्षीय महिलेची वैद्यकीय चाचणी बुधवारी करण्यात आली. आता अहवालाची प्रतिक्षा आहे. मंडल म्हणाले ‘पीडित महिलेने सांगितले की ती फक्त एका आरोपीला ओळखते. आम्ही त्या आरोपीला चौकशीसाठी ताब्यात घेतले आहे. जर त्याची या गुन्ह्यातील त्याचा सहभाग सिद्ध झाला तर त्याला तुरुंगात टाकण्यात येणार आहे.’
दरम्यान, डीआयजींनी ‘आम्ही या गुन्ह्यासंदर्भात गावकऱ्यांकडे चौकशी करत आहोत. आम्ही या प्रकरणाची सखोल चौकशी करत आहोत. कारण महिला आपले वक्तव्य बदलत आहे. ज्यावेळी मी तिची तिच्या गावात चौकशी करत होतो त्यावेळी तिने यामध्ये ५ लोकांचा सहभाग असल्याचे सांगितले होते.’ या महिलेच्या पतीने सांगितले की त्याची पत्नी महिन्यापूर्वी तिच्या आईच्या घरी गेली होती.
