हिवरखेड(धीरज बजाज) –
हिवरखेड येथे सतर्क आणि जागरुक नागरिकांनी काही अनोळखी व्यक्तींना संशयास्पदरित्या बंदुकीने पक्ष्यांची शिकार करताना प्रत्यक्षरीत्या पाहिल्याने त्यांनी ही गुप्त माहिती तत्काळ एका कर्तव्यदक्ष वनरक्षकाला दिली. सोबतच काही ईसम पक्ष्यांची शिकार करून गाडीमध्ये घेऊन जात आहेत अशी गुप्त माहिती
मेळघाट व्याघ्र प्रकल्प अकोट वन्यजीव विभाग अंतर्गत वनपरिक्षेत्र अधिकारी फिरते पथक संरक्षण दल यांना मिळाली. त्यावरून अकोट- तेल्हारा- सोनाळा या टी पॉइंटवर ढाब्या जवळ सापळा रचण्यात आला. तेव्हा सदर ठिकाणी दुपारी टाटा विंजर 14 सीटर वाहन क्रमांक एम एच 12 एम डब्ल्यू 8412 या वाहनाची तपासणी केली असता सदर वाहनांमध्ये वाहनचालक आणि दोन व्यक्ती आढळून आले. त्यांना विचारणा केली असता त्या व्यक्तींनी नावे मोहम्मद फैजल मोहम्मद इस्माईल, इम्तियाज अहमद नजीमोद्दिन अहमद, मोहम्मद इमरान मोहम्मद उस्मान, सर्व राहणार मालेगाव जिल्हा नाशिक असे सांगितले. सदर शिकाऱ्याकडे 6 रातवा पक्षी (नाईट जार), 2 पारवा पक्षी (ब्लू रॉक पीजन), 1 जंगली कबूतर (कोलार्ड डोव्ह) असे एकूण 9 पक्षी शिकार केलेल्या मृत अवस्थेमध्ये आढळून आले.
सदर टाटा विंजर गाडीची तपासणी केली असता आरोपीकडून एक एअरगन, 25 छर्रे बुलेट, एक चाकू, एक बॅटरी, घटनास्थळावरून जप्त करण्यात आली. सदर आरोपींची अधिकाऱ्यांनी कसून तपासणी केली असता त्यांनी त्यांचे एकूण नऊ साथीदारांसह दिनांक 18 ऑक्टोबर रोजी मेळघाट व्याघ्र प्रकल्पातील अकोट वन्यजीव विभाग आकोट अंतर्गत वनपरिक्षेत्र वान मधील परिवर्तुळ पूर्व झरी वन अखंड क्रमांक 1087 मध्ये वनगुन्हा केल्याचे दिसून येते.
सदर प्रकरण वनपरिक्षेत्र अधिकारी फिरते पथक यांनी भारतीय वन अधिनियम तसेच वन्य जीव संरक्षण अधिनियम चे विविध कलमानुसार गुन्हे नोंदविण्यात आले.
सदर प्रकरणी पुढील तपास विश्वनाथ चव्हाण वनपरिक्षेत्र अधिकारी फिरते पथक संरक्षण दल हे अप्पर प्रधान मुख्य वनसंरक्षक तथा क्षेत्र संचालक मेळघाट व्याघ्र प्रकल्प एस एम रेड्डी, उपवनसंरक्षक नवलकिशोर रेड्डी यांच्या मार्गदर्शनाखाली करीत आहेत.
उपरोक्त कारवाईमध्ये सहाय्यक वनसंरक्षक लक्ष्मण आवारे, वान रेंज चे वन परिक्षेत्र अधिकारी प्रवीण डी पाटिल, वनपरिक्षेत्र अधिकारी फिरते पथक विश्वनाथ चव्हाण, वनपाल एम.सी. ठाकूर, वनरक्षक, सरंजू भारती, एम बी अंभोरे, कैलास चौधरी, इत्यादींनी सहभाग घेतला.