मूर्तीजापूर : भरधाव ट्रक आणि कारची अमोरासमोर धडक होऊन झालेल्या भीषण अपघातात दोन चिमुकल्यांसह चार जण ठार, तर अन्य तीन जण गंभीर जखमी झाल्याची घटना सोमवारी दुपारी राष्ट्रीय महामार्ग क्र. सहा वर मुर्तीजापूरजवळ घडली. कारमधील कुटुंब नागपूरचे असल्याची माहिती असून, जखमींना रुग्णालयात हलविण्यात आले आहे.
नागपूरहून येत असलेल्या कारला नागठाणा गावाजळ विरुद्ध दिशेने जात असलेल्या कंटेनरने जोरदार धडक दिली. या कारमध्ये सात जण प्रवास करत होते. कारला बसलेलेली धडक एवढी जोरदार होती की, कारमधून तीन जण बाहेर फेकल्या गेले. उर्वरित चार जण कारच्या सांगाड्यातच अडकले. या अपघातात दोन चिमुकल्यांचा जागीच मृत्यू झाला. तर एक पुरुष व महिलेचा उपचारार्थ नेत असताना वाटेत मृत्यू झाला. या अपघातात तीन जण गंभीर जखमी झाले असून, त्यांना अकोला येथील सर्वोपचार रुग्णालयात हलविण्यात आले आहे.
