मूर्तिजापूर (प्रतिनिधी)- मूर्तिजापूर येथील डॉ. बाबासाहेब आबेडकर चौकात असलेल्या अतुल पान सेंटर चे संचालक राहुल प्रभाकर इंगोले हे ६ डिसेंबरच्या कार्यक्रमासाठी जमा केलेले वर्गणीचे १५ हजार रुपये घेऊन जमा करण्यासाठी जात असताना मागून दुचाकी घेऊन येणाऱ्या दोघांनी हिसकावून घेतले. घटना ३ डिसेंबर रोजी संध्याकाळी ७:३० वाजताच्या दरम्यान घडली.
राहुल इंगोले व त्यांचा मित्र मनिष शर्मा हे दोघेजण स्टेशन वरुन दुचाकीने वर्गणीचे पैसे देण्यासाठी खांडेकर गुरुजी यांचेकडे जात असताना मागून जितू होटे व सलमान तायडे हे दोघे, एमएच ३० एम वाय ३७०७ या क्रमांकाच्या दुचाकीवरून आले व तेथे राहूल इंगोले व त्याच्या मित्रास थांबवून पैशाची मागणी केली. राहूल याने पैसे देण्यास नकार दिला मात्र त्याच्या जवळ असलेल्या पाचशेच्या ३० नोटा असे १५ हजार रुपये हिसकावून व शिविगाळ करून पोबारा केला, असल्याची तक्रार दाखल करण्यात आली आहे. तक्रारीवरून आरोपी जितु होटे व सलमान तायडे याचे विरुद्ध शहर पोलीसांनी भादवि च्या कलम ३९२, २९४, ५०६, ३४ अन्वये गुन्हा दाखल केला आहे. या प्रकरणाची शहरात माहिती व्यापारी वर्गात पसरल्याने शहरात भीतीचे वातारण झाले आहे.
