मुंबई : सुट्टीच्या दिवसांत रेल्वेची तिकीटे मिळवण्यासाठी काहींनी ‘हद्दच’ ओलांडलीय. गर्दीच्या ट्रेनमध्ये आरक्षित तिकीटं मिळवण्यासाठी चक्क कॅन्सरपीडितांच्या कोट्याचा दुरुपयोग केला जात असल्याचं समोर आलंय. पश्चिम रेल्वेच्या दक्षता विभागानं तिकीटांचा काळाबाजार करणाऱ्या टोळीचा पर्दाफाश केला आहे.
४ मे रोजी जबलपूर रेल्वे स्थानकावर एका व्यक्तीला ट्रेनमधून उतरवण्यात आलं. सूरज पांडेय नावाची ही व्यक्ती कॅन्सरग्रस्तांच्या कोट्यातील अर्जावर प्रवास करत होती. पश्चिम रेल्वेच्या दक्षता विभागानं सौरभ मसेकर आणि मनोज यादव यांच्या नेतृत्वाखाली एक पथक तयार केलं. मुंबई विभागात कॅन्सरग्रस्तांच्या कोट्याचा दुरुपयोग होत असल्याची माहिती त्यांना मिळाली होती. काही जण बोगस प्रमाणपत्रांद्वारे प्रवास करत असल्याचं समजलं. ‘दादर पॅसेंजर रिझर्व्हेशन’कडे कॅन्सरग्रस्त कोट्यामधून अर्ज येत असल्याचे पथकातील एका अधिकाऱ्यानं सांगितलं. कोट्यातून मिळालेल्या अर्जांची छाननी केल्यानंतर डॉ. एम. डी. अग्रवाल यांच्या नावाचे सर्वाधिक अर्ज मिळाले. यासंबंधी डॉ. अग्रवाल यांची चौकशी केल्यानंतर सर्व अर्ज बोगस असल्याचं समोर आलं.
याच बोगस प्रमाणपत्रावर सूरज कुमार पांडेय याने सीएसएमटीहून वाराणसीसाठी २ एसीमध्ये कॅन्सरपीडित कोट्यातून तिकीट आरक्षित केलं होतं. ४ मे रोजी ट्रेन जबलपूरला पोहोचली त्यावेळी तिकीट तपासनीसानं त्याला कॅन्सरग्रस्त असल्याचं सिद्ध करण्यासाठी कागदपत्रे मागितली. मात्र तो कागदपत्रे सादर करू शकला नाही. सूरजने २३५० रुपयांचं तिकीट १२०५ रुपयांना बुक केलं होतं. दरम्यान पांडेयची चौकशी सुरू असल्याचं अधिकाऱ्यांनी सांगितलं.
अर्ज टाकून आरोपी पळाला!
दक्षता विभागाचं पथक दादर पीआरएसमधील सीसीटीव्ही कॅमेरे तपासत असताना एक संशयित व्यक्ती हातात अर्ज घेऊन फिरत असल्याचं लक्षात आलं. छापेमारीच्या दिवशी त्याला पथकानं घेरलं. त्यावेळी अर्ज तेथेच टाकून तो पळाला. एका अधिकाऱ्यानं सांगितलं की, एकूण ७४ बोगस प्रमाणपत्र सापडले आहेत. आरोपीचा शोध सुरू आहे. याप्रकरणी गुन्हा दाखल करण्यात येणार आहे. सर्व प्रमाणपत्रांवर डॉ. अग्रवाल यांची सही आणि शिक्का होता. ‘एनबीटी’नं डॉ. अग्रवाल यांच्याशी संपर्क साधला असता तो होऊ शकला नाही. ‘माझ्याकडून अशा प्रकारचे कोणतेही प्रमाणपत्र जारी केले नाहीत,’ असं डॉ. अग्र; वाल यांनी रेल्वे प्रशासनाला सागितलं.
अधिक वाचा : जीएसटीची कार्यपद्धती नव्याने समजून घेण्यासाठी अकोल्यात २ दिवसीय कार्यशाळा
अकोला शी संबंधित सर्व बातम्यांसाठी आम्हाला फेसबुक, ट्विटर, यूट्यूब वर फॉलो करा.
अवर अकोला ला फेसबुक वर लाईक करा – www.facebook.com/OurAkolaMedia
अवर अकोला’च्या यूट्यूब चॅनेलला सबस्क्राईब करा – www.youtube.com/OurMediaNetworks
अवर अकोला ला ट्विटरवर फॉलो करा – https://twitter.com/ourakola
अवर अकोला ला इन्स्टाग्रामवर फॉलो करा – www.instagram.com/OurAkola
