अकोला : ‘गेल्या पाच वर्षांत पंतप्रधान नरेंद्र मोदी यांनी घेतलेल्या निर्णयांमुळे देश डबघाईला आला आहे. त्यातच पुन्हा नरेंद्र मोदी आणि अमित शहा सत्तेवर आले तर ते देशाला गुलाम बनवतील. त्यामुळेच देशात लोकशाही हवी की हुकूमशाही हवी हे ठरवणारी ही निवडणूक आहे. म्हणूनच नरेंद्र मोदी आणि अमित शहा पुन्हा या देशाच्या राजकीय क्षितिजावर दिसणार नाहीत, हे लक्षात ठेवून सारासार विचार करून मतदान करा,’असे आवाहन महाराष्ट्र नवनिर्माण सेनेचे पक्षप्रमुख राज ठाकरे यांनी गुरुवारी पुण्यातील सभेद्वारे मतदारांना केले.
महाराष्ट्र नवनिर्माण सेनेचे पक्षप्रमुख राज ठाकरे यांची यंदाच्या लोकसभा निवडणुकीपूर्वीची एकमेव सभा गुरुवारी सिंहगड रस्त्यावरील माणिकबागेत झाली. त्यामध्ये त्यांनी पंतप्रधान नरेंद्र मोदी यांना लक्ष्य केले. या सभेसाठी मोठी गर्दी झाली होती. ‘नरेंद्र मोदी यांच्या पंतप्रधानपदाच्या काळात देश डबघाईला गेल्याचे अर्थतज्ज्ञांचे मत आहे. पुन्हा ते सत्तेवर आले तर देश आणखी रसातळाला जाईल. पाच वर्षांत त्यांनी जे रंग दाखवले ते पाहता पुढील पाच वर्षांत ते काय करू शकतील, याची कल्पना केलेलीच बरी. त्यामुळे त्यांच्या हाती पुन्हा सत्ता द्यायची का, याचा विचार करा. त्यांना आणि त्यांना प्रत्यक्ष-अप्रत्यक्ष मदत करणाऱ्यांनाही सत्तेपासून दूर ठेवा. नरेंद्र मोदी यांनी सत्तेवर येण्यापूर्वी नागरिकांना विविध आश्वासने दिली होती. अनेक स्वप्न दाखवली होती. त्यातले एकही आश्वासन त्यांना पूर्ण करता आले नाही. त्याबद्दल चकार शब्दही न काढता मोदी आता शहीद जवानांच्या आधारावर, जातीच्या आधारावर मते मागत आहेत,’ असे राज ठाकरे म्हणाले. ‘
जवान, शेतकरी किंवा अन्य कोणाच्याही बाबतीत मोदी यांना आस्था नाही, प्रेमही नाही. जवानांपेक्षा व्यापारी अधिक साहसी असतो, असे मोदी म्हणतात. त्यातूनच त्यांची मानसिकता कळते. मोदींनी सत्तेवर येण्यापूर्वी अनेक आश्वासने दिली होती. त्याबद्दल देशाला अनेक प्रश्न पडले आहेत. त्यातल्या एकाही प्रश्नाचे उत्तर मोदी यांना द्यायचे नाही. गेल्या पाच वर्षांत देशात अमित शहा यांच्या मुलाची संपत्ती सोडून काहीही सुधारणा झाली नाही. पाच वर्षांत कुठल्याच बाबतीत सुधारणा झाली नाही. मग पुन्हा मोदी यांच्या हातात सत्ता देणार का,’ असा सवालही राज यांनी केला.
अधिक वाचा : ‘हे’ कलाकार मतदान करू शकत नाहीत
अकोला शी संबंधित सर्व बातम्यांसाठी आम्हाला फेसबुक, ट्विटर, यूट्यूब वर फॉलो करा.
अवर अकोला ला फेसबुक वर लाईक करा – www.facebook.com/OurAkolaMedia
अवर अकोला’च्या यूट्यूब चॅनेलला सबस्क्राईब करा – www.youtube.com/OurMediaNetworks
अवर अकोला ला ट्विटरवर फॉलो करा – https://twitter.com/ourakola
अवर अकोला ला इन्स्टाग्रामवर फॉलो करा – www.instagram.com/OurAkola
