मतदार जागृतीसाठी कार्यालयांनी मतदार जागृती मंचाची स्थापना करावी : जिल्हाधिकारी नरेंद्र लोणकर

अकोला (प्रतिनिधी) : मतदार जागृतीसाठी निवडणुक आयोगाने विविध शासकीय विभाग तसेच स्वयंसेवी संस्था, महामंडळ तसेच अन्य संस्थांमध्ये मतदार जागृती मंच स्थापन करण्याची सूचना केली आहे. त्या अनुषंगाने प्रत्येक कार्यालयाने आपल्या कार्यालयात मतदार जागृती मंच स्थापन करावा आणि कार्यालयाच्या दर्शनी भागात मतदार जागृती मंच समितीचा बोर्ड लावावा, अशी सूचना प्रभारी जिल्हाधिकारी नरेंद्र लोणकर यांनी केली.

नियोजन भवनात आज मतदार जागृती मंच कार्यक्रमाचे उदघाटन श्री. लोणकर यांच्या हस्ते झाले. यावेळी ते बोलत होते. व्यासपीठावर निवासी उपजिल्हाधिकारी राजेश खवले, उपजिल्हाधिकारी अनिल खंडागळे, नायब तहसिलदार सतीश काळे उपस्थित होते. तर कार्यक्रमासाठी सर्व विभागप्रमखांची उपस्थिती होती.

निवडणुकीत मतदानाची टक्केवारी वाढण्यासाठी मतदारांमध्ये जागृती निर्माण करणे आवश्यक आहे, त्यासाठी शासकीय कार्यालये व इतर संस्था महत्त्वाची भूमिका पार पाडतील, असे निवडणुक आयोगाचे मत आहे. त्यानुसार आयोगाने कार्यालयांमध्ये मतदार जागृती मंच स्थापन करण्याचे सूचित केले आहे. या मंचचा उददेश मतदार नोंदणी, निवडणुक प्रक्रीया तसेच मतदारांमध्ये मताच्या हक्काची जाणीव करुन देण्याचा राहील. मतदार जागृती मंचाच्या कार्यक्रमांचे योग्य आयोजन केले तर शासकीय कार्यालयातील सदस्यांमध्ये मतदानाविषयी जागृती निर्माण होईल. त्यामुळे आगामी लोकसभा निवडणुकीमध्ये मतदारांचा सहभाग वाढविण्यामध्ये मोलाचे सहकार्य होईल. प्रत्येक कार्यालयाने आपल्या कार्यालयात तातडीने मतदार जागृती मंचाची स्थापना करावी. तसेच निवडणुकीचे काम हे अत्यंत महत्त्वपूर्ण असून या कामामध्ये कुठल्याही प्रकारची दिरंगाई करु नये, असे यावेळी श्री. लोणकर यांनी सांगितले.

श्री. खवले यांनी मतदार जागृती मंचचा उददेश सविस्तरपणे स्पष्ट केला. मतदार यादीत नाव कसे नोंदवायचे, इव्हीएम/व्हीव्हीपॅट म्हणजे काय, तसेच वेळोवेळी निवडणुक आयोगाकडून प्राप्त होणाऱ्या सूचनांची माहिती या मंचच्या माध्यमातून कार्यालयातील कर्मचाऱ्यांना अवगत करण्याबरोबरच मतदारांमध्ये मतदान प्रक्रीयेची माहिती देण्याची सूचना त्यांनी केली. प्रास्ताविक श्री. काळे यांनी तर सूत्रसंचालन सचिन भांबेरे यांनी केले. यावेळी जिल्हाधिकारी कार्यालयात स्थापन झालेल्या मतदार जागृती मंचच्या बोर्डाचे जिल्हाधिकारी यांच्या हस्ते फीत कापून विमोचन करण्यात आले.

अधिक वाचा : दानापूर हनुमान प्रसाद जनता विद्यालय येथे निसर्गाची धमाल शाळा कार्यशाळा संपन्न

अकोला शी संबंधित सर्व बातम्यांसाठी आम्हाला फेसबुक, ट्विटर, यूट्यूब वर फॉलो करा.

अवर अकोला ला फेसबुक वर लाईक करा – www.facebook.com/OurAkolaMedia

अवर अकोला’च्या यूट्यूब चॅनेलला सबस्क्राईब करा – www.youtube.com/OurMediaNetworks

अवर अकोला ला ट्विटरवर फॉलो करा – https://twitter.com/ourakola

अवर अकोला ला इन्स्टाग्रामवर फॉलो करा – www.instagram.com/OurAkola