मूर्तीजापुर (प्रतिनिधी ) : शहरात मागील दहा दिवसापासुन मोठ्या भक्ती भावाने सुरु असलेल्या सार्वजनिक गणोशोत्सवासह घरोघरी बसलेल्या गणरायाला दि.२३ सप्टेंबर रोजी जड अंत:करणाने निरोप देण्यात आला. शहरातील संपूर्ण सार्वजनिक गणेश मंडळांनी विसर्जन मिरवणुकीची जयत केली होती. पुढच्या वर्षी लवकर या..च्या निनादात गणेश विसर्जन मिरवणुकीस दुपारी दोन वाजतापासून प्रारंभ झाला. मूर्तीजापुर शहर हे दोन विभागात असुन जुनी वस्ती व स्टेशन विभागात गणेश विसर्जन मिरवणुकीसाठी चोख पोलिस बंदोबस्त ठेवण्यात आला होता. मोठ्या हर्षोल्हासात आणि ढोलताशांच्या व दिंडी च्या निनादात विविध धार्मिक कार्यक्रम सतत दहा दिवस आयोजित करून गणेशोत्सव शांततेत साजरा करण्यात आला. सतत दहा दिवस लहानांपासून ते मोठ्यापर्यंत सर्वच जण गणरायाच्या पूजेमध्ये गुंतलेले होते. दहाव्या दिवशी बाप्पांची सरबराई केल्यानंतर आता रविवारी दुपारी बारा वाजता पासून विसर्जन मिरवणुकीस सुरुवात झाली. आप आपल्या परीने विविध सार्वजनिक गणेश मंडळाच्या कार्यकर्ता यांनी मिरवणुकीस प्रारंभ केला.

शहरातील मानाच्या हजारी यांच्या गणपती मंदिर येथून मिरवणुकीस सुरुवात झाली. त्यासोबतच चंद्रशेखर आझाद मंडळ मलाईपुरा अशी दोन गणेशोत्सव मंडळ हे मेनरोड ने फिरून मोमिनपुरा येथील मस्जिद समोरून निघत असते. ही अनोखी मिरवणूक पहाण्यासाठी स्टेशन विभाग परीसरात नागरिक, मंडळाचे कार्यकर्ते, महिला मोठ्या प्रमाणात उपस्थीत असतात कारण ही मिरवणूक पहाण्यासारखी असते. यावर्षी चंद्रशेखर आझाद गणेश मंडळाच्या वतीने मस्जिद समोर विविध फुलांच्या पाकळ्या चे उधळण करत शोभायात्रा काढली. या दरम्यान कुठेही अनुचित प्रकार घडला नाही. सर्व शांतपणे उत्सव पार पडला. काही मंडळांनी रविवारी तर काही गणेश मंडळाच्या वतीने सोमवारी विसर्जन मिरवणुक काढली होती. उशीरा पर्यंत मिरवणूक सुरू होती. याकरीता शहर पोलीस स्टेशन चे ठाणेदार दत्तात्रय आव्हाडे यांच्या नेतृत्वाखाली पोलिस उप निरीक्षक, कर्मचारी, एस.आर.पी, होमगार्ड, वाहतूक कर्मचारी वर्ग यांनी चोख बंदोबस्त ठेवला होता. मस्जिद समोरून निघणाऱ्या मिरवणूक कार्यक्रम स्थळी कपीले बंधु यांच्या वतीने भक्ततांसाठी फराळ,नाश्ता चे वितरण करण्यात आले. तर विविध ठिकाणी जाऊन विलास वानखडे यांनी थंड पाण्याचे आपल्या दुचाकी वरून वितरण केले. गणेश विसर्जन मिरवणुक शांतपणे पार पाडण्यासाठी मस्जिद समोर उपविभागीय अधिकारी तथा तहसीलदार राहुल तायडे, नायब तहसिलदार वैभव फरताडे, नगर परिषद मुख्याधिकारी विजय लोहकरे, नगरसेवक , समाजसेवक, शांतता समीती सदस्य, पत्रकार, मंडळ अधिकारी अनिल बेलाडकर, तलाठी जि.जि.भारती,विविध मंडळाचे कार्यकर्ता, मुस्लिम बांधव आदी बहुसंख्येने उपस्थित होते.

No Result