रिलायन्स इंडस्ट्रीज लिमिटेडच्या वार्षिक बैठकीला सुरुवात झाली आहे. यामध्ये रिलायन्स जिओच्या दुसऱ्या फोनची घोषणा करण्यात आली आहे. जिओ फोन-2 हा फोन जिओ वनचं पुढील व्हर्जन असेल. यामध्ये पहिल्या जिओ फोनमध्ये नसलेल्या अनेक सुविधा देण्यात आल्या आहेत. मुंबईतील बिर्ला मातोश्री सभागृहात रिलायन्सची बैठक सुरू आहे.
रिलायन्स समूहाच्या वार्षिक बैठकील 11 वाजता सुरुवात झाली. या बैठकीत जिओ-2 ची घोषणा करण्यात आली. यामध्ये व्हॉट्सअॅप वापरता येऊ शकतं. याआधी लॉन्च करण्यात आलेल्या जिओच्या फोनमध्ये व्हॉट्सअॅपची सुविधा नव्हती. जिओ फोन-2 मध्ये आडवी स्क्रिन असेल. मात्र जिओ फोन-2 लॉन्च केल्यावरही पहिल्या जिओ फोनचं उत्पादन बंद केलं जाणार नाही. हे दोन्ही फोन बाजारात उपलब्ध असतील.
रिलायन्स जिओ फोन-2 ची किंमत 2,999 हजार रुपये असेल. तुम्ही 501 रुपये देऊन तुमच्या जुन्या फोनच्या बदल्यात नवा जिओ फोन-2 खरेदी करु शकता. 15 ऑगस्टपासून हा फोन उपलब्ध होईल. जिओ फोनवर आता फेसबुक, यूट्यूब आणि व्हॉट्सअॅप मोफत वापरता येईल.
जिओ गिगा टीव्ही
मोबाईल इंटरनेट सेवा क्षेत्रातील धमाक्यानंतर रिलायन्सनं आता ब्रॉडबँड सेवा क्षेत्रात पाऊल टाकलं आहे. याबद्दलची घोषणा रिलायन्स समूहाचे चेअरमन मुकेश अंबानी यांनी केली. रिलायन्सकडून जिओ गिगा टीव्ही सुरू करण्यात येणार आहे. यामुळे भारतीयांची टीव्ही पाहण्याची पद्धत बदलेल, असा विश्वास अंबानी यांनी व्यक्त केला.
जिओ गिगा टीव्ही व्हाईस कमांड आणि रिमोटनं चालेल. यासोबतच जिओ गिगा टीव्हीमध्ये कॉलिंगची सुविधादेखील उपलब्ध असेल. यामुळे एका जिओ गिगा टीव्हीवरुन दुसऱ्या जिओ टीव्हीवर फोन लावता येईल. याशिवाय जिओ गिगा टीव्हीवरुन मोबाईलवरही कॉल करता येईल. या टीव्हीला व्हर्च्युअल रिअॅलिटी हेडसेट लावल्यास 360 अंशातील व्ह्यू पाहता येईल.
जिओ गिगा टीव्हीसोबतच मुकेश अंबानी यांनी जिओ गिगा फायबरचीही घोषणा केली. या घोषणेसोबतच रिलायन्स समूहानं ब्रॉडबँड क्षेत्रात प्रवेश केला आहे. जिओची ब्रॉडब्रँड सेवा सर्वात स्वस्त असेल, असं अंबानी यांनी म्हटलं आहे. त्यामुळे मोबाईल इंटरनेट सेवा क्षेत्राप्रमाणेच ब्रॉडब्रँड क्षेत्रातही आता रिलायन्स जिओ आणि इतर कंपन्यांमध्ये तीव्र स्पर्धा होण्याची शक्यता आहे. याशिवाय जिओ गिगा राऊटर, गिगा टीव्ही सेटटॉप बॉक्स आणि गिगा टीव्ही कॉलिंग सेवेचेही घोषणा करण्यात आली आहे.
अधिक वाचा : नव्या फिचरमुळे व्हॉटसअॅप चा अॅडमिन सर्वशक्तिमान झाला, वाचा सविस्तर.
