अकोला : लोकसभा सार्वत्रिक निवडणूकीसाठी मतदान करण्यापूर्वी मतदारांची ओळख पटविण्यासाठी मतदान ओळखपत्रासह (EPIC) १२ प्रकारचे ओळखीचे पुरावे ग्राह्य धरले जाणार आहेत. निवडणूकीत मतदारांना मतदानाचा हक्क बजावता यावा यासाठी स्वतःची ओळख पटविण्यासाठी निवडणूक आयोगाने बारा प्रकारचे ओळखीचे पुरावे ग्राह्य धरले आहेत. त्यामुळे मतदान करताना मतदाराला ओळख पटविणे शक्य होणार आहे.
या ओळखपत्रात आधार कार्ड, मनरेगा जॉब कार्ड, बँक व पोस्ट ऑफिसने जारी केलेल्या फोटोसह पासबुक, कामगार मंत्रालयाच्या योजनेअंतर्गत जारी केलेले आरोग्य विमा स्मार्ट कार्ड, वाहन चालविण्याचा परवाना, पॅनकार्ड, कामगार मंत्रालयाने जारी केलेले स्मार्ट कार्ड, भारतीय पासपोर्ट, छायाचित्रासह निवृत्तीवेतन दस्तऐवज, केंद्र व राज्य सरकार, सार्वजनिक उपक्रम, पब्लिक लिमिटेड कंपन्यांनी कर्मचाऱ्यांना दिलेली छायाचित्र असलेली सेवा ओळखपत्रे, खासदार, आमदार यांना जारी केलेल्या अधिकृत ओळखपत्रांचा समावेश आहे. यामुळे लोकसभा निवडणुकीत मतदारांना मतदान करताना कोणतीही अडचण येणार नाही. ते आपला मतदानाचा हक्क बजावू शकतील.
