पालघर : पालघर जिल्ह्यात नुकतीच एक धक्कादायक घटना उघडकीस आली आहे. आपल्या बायकोला एका परपुरुषासोबत पाहिल्यानंतर संतापलेल्या पतीने त्याच ठिकाणी बायकोचा आणि तिच्या प्रियकराचा कुऱ्हाडीचा वार करीत खून केला. आरोपीचे नाव दिलीप तानाजी ठोकरे असे असून पोलिसांनी त्याला तात्काळ अटक केली आहे. या घटनेने परिसरात खळबळ उडाली असून पोलिस या प्रकरणाचा अधिक तपास करीत आहेत. दरम्यान मृत संगीता ठाकरे आणि पांडू श्रावण या दोघांचे मृतदेह उत्तरीय तपासणीकरिता माहीम येथील शासकीय रुग्णालयात पाठविण्यात आले आहेत.
याबाबत मिळालेली माहिती अशी की, पालघर तालुक्यातील सफाळे कपासे ठाकूरपाडा याठिकाणी दिलीप तानाजी ठाकरे राहतो. तर त्याची पत्नी संगीता हिचे तिचा नातेवाईक पांडू श्रावण याच्याशी प्रेमसंबंध होते. नातेवाईक असल्याचा फायदा घेत त्यांचे अनैतिक संबंध दिवसेंदिवस वाढत होते. पांडू नेहमी संगीताच्या घरी ये-जा करीत होता. नातेवाईक असल्यामुळे कुणालाही यांच्या प्रेमप्रकरणाची कुणकुण लागली नव्हती. यामुळे त्यांचे प्रेमप्रकरण विनासायास चाललेले होते. दिलीप कामानिमित्त बाहेर गेला की इकडे पांडू घरी येत असे. दिलीपच्या माघारी त्यांचा प्रेमप्रकरणाचा खेळ खुद्द घरातच चालत होता. आपल्या प्रकरणाची कोणालाही कल्पना नाही हे लक्षात घेऊन ते दोघेही बिनधास्त होते.
दरम्यान, एके दिवशी दिलीप कामासाठी घराबाहेर पडला. तो गेल्याचे पाहून पांडू घरी पोहचला. दोघेही एकमेकांच्या सोबत आक्षेपार्ह्य चाळे करीत होते. त्याचवेळी दिलीप घरी परतला. दार उघडून संगीता आणि पांडू यांना या स्थितीत पाहताक्षणीच त्याच्या तळपायाची आग मस्तकात गेली. रागाच्या भरातच त्याने घरात पडलेली कुऱ्हाड घेतली आणि संगीता आणि पांडू या दोघांच्या डोक्यात गंभीर वार केले. रक्तस्त्राव झाल्यामुळे दोघांचा जागीच अंत झाला.
