तेल्हारा(प्रतिनिधी)- आज दुपारी तालुक्यातील हिंगणी बु येथील एका घरात सिलेंडरने पेट घेतल्याने जवळपास सात ते आठ घरांना या आगीच्या भस्मात सापडली होती आर्थिक नुकसान झाल्याने बेलखेड जिल्हा परिषद सदस्य यांनी मदतीचा हात देऊन तत्परता यावेळी दाखवली.
सविस्तर असे की तेल्हारा तालुक्यातील हिवरखेड पोलीस स्टेशन अंतर्गत येणाऱ्या हिंगणी बु. येथील श्रीमती मंगलाबाई शेषराव कोरडे या महिलेच्या घरी मंगळवार दिनांक 15 सप्टेंबर रोजी सकाळी साडे अकरा वाजेच्या दरम्यान स्वयंपाकासाठी गॅस सुरू केला असता इंडेन सिलेंडर ने अचानक पेट घेतला सिलेंडर ने पेट घेतल्याचे पाहताच एकच धावपळ उडाली. मंगलाबाई कोरडे यांच्यासहित शेजाऱ्यांनी आरडाओरड केला आणि घराबाहेर पळाले त्यामुळे सुदैवाने या घटनेत जीवित हानी झाली नाही. थोड्याच वेळात पेटलेल्या सिलेंडरचा भीषण स्फोट झाला. ज्यामुळे मोठा धमाका झाला जणू काही मोठा बॉम्बस्फोट झाला असावा अशी परिस्थिती झाली होती. सिलेंडरचा स्फोट होताच
गावकऱ्यांनी आग विझविण्यासाठी धाव घेतली आणि युवकांनी आग विझविण्यासाठी शर्थीचे प्रयत्न केले. मंगलाबाई कोरडे यांच्या घरासह शेजारील माणिकराव सदाशिव कोरडे आणि गोपाल विश्वनाथ कोरडे अशा एकूण तीन घरातील संपूर्ण मुद्देमाल जळून खाक झाला आणि तिन्ही घरे राहण्यास योग्य राहिली नाहीत. मंगलाबाई च्या घरातील रोकड पन्नास हजार रुपये, जीवनावश्यक वस्तू जळून खाक झाल्या दोन क्विंटल गहू, तांदूळ, ज्वारी, डाळी, रेशन कार्ड, बँक पासबुक, इत्यादि सर्व नामशेष झाले. मंगला बाई सोबतच दोन्ही शेजाऱ्यांच्या घरातील संपूर्ण साहित्य भस्मसात झाले आहे. त्यामुळे तिन्ही कुटुंब उघड्यावर आले आहेत. आग लागल्यानंतर तेल्हारा अग्निशमन दल घटनास्थळावर दाखल झाले आणि आग विझविण्यास पुढाकार घेतला. हिवरखेड पोलीस घटनास्थळी पोहोचली आणि तलाठ्यांनी घटनास्थळाचा पंचनामा केला आहे. सिलेंडर स्फोटामुळे लागलेल्या आगीत भयावह नुकसान झाल्याने सदर नुकसानग्रस्त कुटुंबांना तातडीने भरीव आर्थिक मदत करण्यात यावी अशी मागणी जोर धरत आहे. यावेळी बेलखेड जिल्हा परिषद सदस्य यांनी माणुसकी दाखवत श्रीमती मंगला शेषराव कोरडे यांना हिंगणी बु गाठून पाच हजार रुपयांची आर्थिक मदत केली.यावेळी उपसरपंच ज्ञानेश्वर कोरडे, पंचायत समिती सदस्य संजय लांडे, सुधाकर हागे, विनोद गावंडे ,अनिल तायडे यांच्यासह अनेक जण उपस्थित होते.