अकोट (तालुका प्रतिनिधी शिवा मगर) : अकोला जिल्हा पोलिस अधीक्षकांच्या विशेष पथकाने हिवरखेड नजीकच सुरू असलेल्या उंबरवडी शेत शिवारातील जुगार अड्ड्यावर हिवरखेड पोलिसांच्या नाकावर टिच्चून धाड टाकून मोठी कारवाई केल्यामुळे हीवरखेड ठाणेदाराच्या कार्यक्षमतेवर प्रश्नचिन्ह निर्माण झाले आहेत.
सविस्तर असे की, जिल्हा पोलीस अधीक्षक यांचे पथक आकोट विभागात कर्तव्यावर असताना त्यांना गुप्त माहिती मिळाली की हिवरखेड परिसरात उंबरशेवडी शेतशिवारात अवैद्य जुगार सुरू आहे या माहितीवरून विशेष पथकाने जुगारावर छापा टाकला असता त्याठिकाणी आरोपीकडून नगदी 7,320 आणि पाच मोटरसायकल किंमत अंदाजे 1,45,000 असा एकूण 1,65,320 रुपयांचा मुद्देमाल जप्त करण्यात आला. यामध्ये संतोष विश्वनाथ गावंडे हिवरखेड, शहादेव सुखदेव गव्हाळे तळेगाव बाजार, अक्षय गणेश बोडखे हिवरखेड, नागोराव भीमराव खुमकर तळेगाव बाजार, विश्वनाथ जगन्नाथ मसुरकर हिवरखेड, केवल देशमुख हिवरखेड, अशोक बोडखे, यांच्यासह एकूण नऊ आरोपींविरुद्ध गुन्हा दाखल करण्यात आला आहे. कोरोना विषाणूचा प्रादुर्भाव रोखण्यासाठी अकोला जिल्हाधिकाऱ्यांनी संचारबंदी आदेश काढत कलम 144 लागू केलेले असतानाही त्यांच्या आदेशाचे उल्लंघन करीत या सर्व आरोपींनी कोरणा आजार पसरेल या हेतूने कृत्य केल्याने त्यांच्याविरुद्ध गुन्हा नोंदविण्यात आला आहे. उपरोक्त कारवाई विशेष पथकाचे प्रमुख मिलिंद बहाकर यांच्या नेतृत्वात सहकार्यांसह अत्यंत गुप्तता पाळत कुशलतेने करण्यात आली.
पोलीस नावाचा गैरवापर ?
पोलिसांनी जप्त केलेल्या पाच मोटरसायकली पैकी एक काळी प्लेटिना दुचाकी चक्क विना क्रमांकाची असून दुसऱ्या एका मोटरसायकलवर चक्क पोलीस लिहिलेले असल्याने आश्चर्य व्यक्त होत आहे. गाड्यांवर पोलीस आणि प्रेस लिहून कारवाईपासून वाचण्याचा फंडा अनेकजण वापरत आहेत. हिवरखेड मध्ये तर प्रेस लिहिलेल्या गाड्यांचा सुळसुळाट असून वास्तविक पत्रकारांपेक्षा इतर अनेक जण प्रेस लिहिलेला गाड्यांचा वापर करीत असल्याचे निदर्शनास येते. पोलीस लिहिलेली गाडी जुगारात जप्त झाल्यामुळे ही बाब चव्हाट्यावर आली असून प्रेस व पोलिस नावाचा गाड्यांवर गैरवापर करणार्यांच्या विरोधात धडक मोहीम राबविण्याची गरज निर्माण झाली आहे.