अकोला: जिल्ह्यात आज (सायं. पाच वा.) अखेर एकही कोरोना विषाणू संसर्गित रुग्ण नाही. आज दिवसभरात २२ जण संशयित रुग्ण म्हणुन दाखल झाले. त्यांचे घशातील स्त्रावाचे नमुने तपासणीसाठी पाठविण्यात आले. आतापर्यंत ६२ नमुने तपासणीसाठी पाठवले आहेत. त्यापैकी ३२ जणांचे अहवाल प्राप्त झाले असून सर्वच्या सर्व निगेटिव्ह आहेत. तर ३० जणांचे अहवाल अद्याप प्रलंबित आहेत. हे ३० जण सध्या विलगीकरण कक्षात निरीक्षणात आहेत,अशी माहिती निवासी उपजिल्हाधिकारी संजय खडसे यांनी दिली.
जिल्ह्यात आजतागायत प्रवासी म्हणून १७२ जणांची नोंद झाली आहे. त्यातील ४५ जण अद्याप गृह अलगीकरणात आहेत. तर ९६ जणांचा गृह अलगीकरणाचा १४ दिवसांचा कालावधी पूर्ण झाला आहे. तर ३० जण विलगीकरण कक्षात वैद्यकीय निरीक्षणात आहेत.
दरम्यान तब्लिगी जमात मरकस च्या दिल्ली येथील कार्यक्रमातून जिल्ह्यात आलेल्या दहा व्यक्तींपैकी प्रत्यक्षात चारच व्यक्ती जिल्ह्यात आल्या आहेत. अन्य सहा व्यक्ती या जिल्ह्याबाहेर यापुर्वीच गेल्या आहेत. जिल्ह्यात असलेल्या चौघा जणांशी प्रशासनाचा संपर्क झाला असून चौघांना शासकीय वैद्यकीय महाविद्यालयात दाखल करण्यात आले आहे. त्याचप्रमाणे,आज मौजे वाडेगाव ता. बाळापुर येथील १८ व्यक्ती शासकीय वैद्यकीय महाविद्यालयात दाखल झाल्या आहेत. त्यामुळे संख्येत वाढ झाली आहे. हे लोक दिल्लीहून आले असून गेल्या २ मार्च पासून वाडेगाव येथे वास्तव्यास होते. त्यांना आज शासकीय वैद्यकीय महाविद्यालयात दाखल करण्यात आले, अशी माहिती निवासी उपजिल्हाधिकारी संजय खडसे यांनी दिली.
