तेल्हारा (प्रतिनिधी)- तेल्हारा येथील ९ वर्षीय चिमुकलीचे स्थानिक कृषी उत्पन्न बाजार समितीच्या मार्केट यार्ड समोरून अपहरण करण्यात आले होते अपहरणात वापरलेली मोटारसायकल काल वाडेगाव ता बाळापूर येथून तेल्हारा पोलिसांनी जप्त केली असून आरोपी मात्र अद्याप फरार असल्याने त्याचा शोध पोलीस घेत आहेत.
पोलीस सूत्रांकडून मिळालेल्या माहिती नुसार स्थानिक साई मंदिर परिसरात राहणारी ९ वर्षीय चिमुकलीचे अपहरण दि. १४ ऑगस्ट रोजी करण्यात आले होते. सदर चिमुकलीला अपहरणकर्त्याने पाथर्डी येथील नदी पुलाखाली घेऊन गेला होता. त्यानंतर सदर चिमुकलीने प्रसंगावधान राखत तिथून पळ काढून रस्त्याने पळत सुटली होती. तिथून जाणाऱ्या काही वाहनधारकांना सदर चिमुकली दिसल्याने त्यांनी विचारपूस करीत तिला तिच्या घरच्यांच्या स्वाधीन केले. त्यानंतर चिमुकलीच्या वडिलांनी तेल्हारा पोलिसांना याबाबत माहिती देऊन तक्रार दाखल केली. याप्रकरणी तेल्हारा पोलिसांनी अपहरणाचा गुन्हा दाखल करून शोध मोहीम राबवली असता जवळपास १५ दिवसांनी अपहरण कर्त्याने वापरलेली मोटारसायकल पोलिसांनी काल वाडेगाव ता. बाळापूर येथून जप्त केली असून या प्रकरणातील अपहरणकर्ता आरोपी चंदू गोविंदा कुकडे (४०) रा. रानेगाव ता. तेल्हारा ह. मु. बेलुरा ता. पातुर याचा तेल्हारा पोलिस शोध घेत आहेत. सदर कारवाई ठाणेदार विकास देवरे यांच्या नेतृत्वाखाली पोलीस उपनिरीक्षक गवारगुरू,पो कॉ राजू इंगळे,अमोल नंदाने यांनी केली.
