महागाई वाढणार; निवडणुकीनंतर पेट्रोल दरवाढ?

नवी दिल्ली : लोकसभा निवडणुकीच्या अखेरच्या टप्प्यानंतर पेट्रोल व डिझेलच्या दरांत वाढ होण्याची शक्यता वर्तवली जात आहे. आंतरराष्ट्रीय बाजारात कच्च्या इंधनाच्या दरात होत असलेली वाढ, रुपयाची घसरण आणि इराणकडून कमी दरात होणारा इंधनपुरवठा चालू महिन्यात बंद होणार असल्याने २० मे पासून पेट्रोल व डिझेल दरवाढ होण्याचे संकेत आहेत. कच्च्या इंधनाचे दर वाढत असल्याने सरकारी इंधन कंपन्यांना आर्थिक झळ बसत आहे. मात्र लोकसभा निवडणूक सुरू असल्याने सरकारने पेट्रोल दरवाढ रोखून धरल्याचे समजते.

इराणकडून होणारी इंधन आयात संपुष्टात

अमेरिकेने इराणवर लादलेल्या आर्थिक निर्बंधांमुळे भारताने इराणकडून केल्या जाणाऱ्या कच्च्या इंधनाच्या आयातीत कपात केली आहे. एप्रिलमध्ये या आयातीचे प्रमाण ५७ टक्क्यांनी कमी झाले. चालू महिन्यापासून इराणकडून केली जाणारी आयात पूर्णपणे संपुष्टात येणार आहे. यामुळे भारताचा इंधनखर्च वाढणे जवळपास निश्चित असून देशांतर्गत पेट्रोल व डिझेलच्या दरांवर त्याचा विपरित परिणाम होण्याचे संकेत आहेत.

अमेरिकेने इराणवर गेल्या वर्षी नोव्हेंबरमध्ये आर्थिक निर्बंध लादले. यानंतर इराणकडून होणारी इंधनखरेदी सहा महिन्यांत टप्प्याटप्याने संपुष्टात आणण्याची सूचना अमेरिकेने भारत व चीनसह अनेक देशांना केली होती. ही मुदत एप्रिलमध्ये संपल्याने इराणकडून होणारी इंधन आयात आता बंद होण्याच्या स्थितीत आहे. भारताने एप्रिलमध्ये इराणकडून दररोज सरासरी २,७७,६०० बॅरल कच्चे इंधन आयात केले.

अमेरिका ताठर

भारताला किफायतशीर दरात कच्चे इंधन देणे शक्य नाही, अशी भूमिका अमेरिकेने घेतली आहे. इंधन कंपन्या या खासगी असल्याने अमेरिकी सरकार त्यांच्यावर दरसवलतीबाबत सक्ती करू शकत नाही, असे अमेरिकेचे वाणिज्य सचिव विल्बर रॉस यांनी येथे सांगितले. अमेरिकेने इराणवर आर्थिक निर्बंध लादल्याने भारताचा प्रमुख स्रोत रोडावला आहे. इराणकडून भारताला कमी दरात इंधन मिळत होते. या पार्श्वभूमीवर अमेरिकेने ही प्रतिक्रिया दिली.

अधिक वाचा : कॅन्सरग्रस्तांच्या नावानं रेल्वे तिकीटांचा काळाबाजार

अकोला शी संबंधित सर्व बातम्यांसाठी आम्हाला फेसबुक, ट्विटर, यूट्यूब वर फॉलो करा.

अवर अकोला ला फेसबुक वर लाईक करा – www.facebook.com/OurAkolaMedia

अवर अकोला’च्या यूट्यूब चॅनेलला सबस्क्राईब करा – www.youtube.com/OurMediaNetworks

अवर अकोला ला ट्विटरवर फॉलो करा – https://twitter.com/ourakola

अवर अकोला ला इन्स्टाग्रामवर फॉलो करा – www.instagram.com/OurAkola