आशियाई खेळांच्या दुसऱ्या दिवशीही भारतीय नेमबाजांनी पदकाची कमाई करत भारताच्या खात्यात आणखी एका पदकाची भर टाकली आहे. १० मी. एअर रायफल प्रकारात भारताच्या दिपक कुमार ने रौप्यपदकाची कमाई केली. पात्रता फेरीत भारताच्या रवी कुमार आणि दिपक कुमार यांनी आश्वासक खेळ करत अंतिम फेरीत प्रवेश मिळवला.
रवी आणि दिपकच्या अंतिम फेरीतील समावेशामुळे या प्रकारात भारत दोन पदकांची कमाई करेल असं चित्र निर्माण झालं होतं. पहिल्या दिवशी कांस्यपदकाची कमाई केलेल्या रवी कुमारनेही आपला सर्व अनुभव पणाला लावत अखेरच्या क्षणांपर्यंत आपलं आव्हान कायम राखलं होतं. मात्र मोक्याच्या क्षणी अपेक्षित कामगिरी न करता आल्यामुळे रवी कुमारला चौथ्या स्थानावर समाधान मानावं लागलं.
दुसरीकडे दिपक कुमारने मात्र संयमी खेळ करत पिछाडी भरुन काढत मातब्बर नेमबाजांना मागे टाकलं. अंतिम फेरीत चीनच्या प्रतिस्पर्ध्याला मागे टाकणं त्याला जमलं नाही. अखेरीस भारताला रौप्य पदकावर समाधान मानावं लागलं.
अधिक वाचा : पाकिस्तानचा फलंदाज नासिर जमशेद वर दहा वर्षांची बंदी
