अकोला दि.12: मतदार नोंदणीला आधार क्रमांक जोडण्यासाठी जिल्ह्यातील सर्व मतदान केंद्रांवर रविवारी (दि. 11) विशेष शिबिरांचे आयोजन करण्यात आले. या शिबीरामध्ये जिल्ह्यातील पाच मतदान संघातील 28 हजार 292 मतदारांचे आधार जोडण्याकरीता(नमुना 6बी) नोंदणी अर्ज प्राप्त झाले आहे, अशी माहिती उपजिल्हा निवडणूक अधिकारी मुकेश चव्हाण यांनी दिली.
शिबीरामध्ये मतदान ओळखपत्राला आधार क्रमांक जोडण्यासाठी प्राप्त नोंदणी अर्ज याप्रमाणे : अकोट मतदार संघात 2 हजार 410, बाळापूर येथे 10 हजार 481, अकोला पश्चिम येथे 1 हजार 693, अकोला पूर्व येथे 4 हजार 997 व मुर्तिजापूर येथे 8 हजार 711 असे एकूण 1 हजार 680 मतदान केंद्रावर 28 हजार 292 मतदारांचे नोंदणी अर्ज प्राप्त झाले आहे.
आतापर्यंत(दि.11सप्टेंबर) जिल्ह्यातील मतदारांचे नमुना 6 बी नोंदणी झालेले अर्ज संख्या याप्रमाणे : अकोट येथे 32 हजार 840, बाळापूर येथे 80 हजार 731, अकोला पश्चिम येथे 5 हजार 419, अकोला पश्चिम येथे 10 हजार 685 व मुर्तिजापूर येथे 76 हजार 445 असे एकूण 2 लक्ष 6 हजार 120 मतदारांचे अर्ज प्राप्त झाले आहे.
मतदान ओळखपत्राला आधार क्रमांक जोडण्यासाठी मोहीम दि. 1 ऑगस्टपासून राबविण्यात येत आहे. विद्यमान मतदारांकडून त्यांची ओळख प्रस्थापित करण्यासाठी मतदार यादीतील त्यांच्या नोंदीचे प्रमाणीकरण करण्यासाठी ही प्रक्रिया होणार आहे. त्याचप्रमाणे, एकापेक्षा जास्त मतदारसंघात किंवा त्याच मतदारसंघाचे नाव एकापेक्षा जास्त वेळा नोंदविले गेले किंवा कसे, याचा पडताळा करण्यासाठी याची मदत होणार आहे. विद्यमान मतदारांनी आधार क्रमांक मतदार नोंदणी अधिकारी किंवा सहाय्यक मतदार नोंदणी अधिकारी यांच्याकडे दाखल करावा. तसेच व्होटर हेल्प लाईन ऍप व https://nvsp.in/ या संकेतस्थळावर ऑनलाइन सुविधाही उपलब्ध करून देण्यात आली आहे. त्याद्वारे ही मतदार आपला आधार क्रमांक नोंदवू शकतात.
