अनिष्ठ परंपरा झुगारत स्वामिनीच्या विधवांनी केले वटपौर्णिमा पुजन १२ वर्षापासुन समाज परिवर्तनाची लढाई कायम

अकोला(प्रतिनिधी)- समाजाती अनिष्ठ रुढी परंपरांना झुगारत स्वामिनी विधवा विकास मंडळाच्या महिलांनी मंगळवारी वट पौर्णिमा साजरी करित पुजन केले.
प्रथमतः घरातुन आणि समाजातुन विधवांना अनेक बंधनांना आजही सामोरे जावे लागते. विधवा वटपौर्णिमा पुजन समाज अमान्य असल्याने विधवा महिला वट पुजनासाठी पुढाकार घेत नाहित किंवा त्यांना घेऊ दिला जात नाही. अशा गंभीर परिस्थितीतही वीरस्त्री स्व. लताताई देशमुख प्रेरीत स्वामिनी विधवा विकास मंडळ प्रवाहाविरुद्ध लढा देत गत बारा वर्षापासुन विधवा वट पौर्णिमा पुजन घेत आहे. विधवा सन्मानार्थ झालेल्या वट पुजनाकरिता स्वामिनीच्या सचिव सुनिता डाबेराव व जिल्हाध्यक्षा साधना पाटिल यांच्या नेतृत्वात रेखाताई नकासकर, कविता तायडे, शिला इवरकर, मीरा वानखडे, सुनिता टाले पाटिल, चेतना गोहेल, स्मिता जंगले, शोभा काहाळे, जयश्री गायकवाड, वर्षा गावंडे, आरती देशमुख, दीपाली देशपांडे, सपना ताथोड या महिलांनी पुढाकार घेत वटपौर्णिमा पुजन करुन विधवांना शुभेच्छा दिल्या. चौकटबद्ध समाजातुन प्रतिसाद नसतांना सुद्धा अनिष्ठ सामाजिक बंधनांना झुगारुन स्वामिनी संघटना करित असलेल्या समाज सुधारणे बाबत उपस्थित सधवा महिलांनी भरभरुन कौतुक केले. हा स्वामिनी पॅटर्न राज्यभर राबवून याला कायदेशिर मान्यता मिळाल्यास विधवा महिलांवरिल सामाजिक दडपण दुर होईल, असा विश्वास संघटनेचे अध्यक्ष संजय कमल अशोक यांनी व्यक्त केला. यावेळी विधवांनी आपले मनोगत व्यक्त करुन स्वामिनी संघटनेने समाजाकडे लक्ष न देता परंपरा कायम ठेवावी आणि शासनाकडे पाठपुरावा करावा असा आग्रह धरला. कार्यक्रमाच्या यशस्वीतेसाठी संघटनेच्या कार्यकर्त्यांनी परिश्रम घेतले.